Adap Utara Sarawak deka dikemansang nyadi palan ngeluarka pemakai
MIRI: Adap Utara Sarawak deka dikemansang nyadi palan ngeluarka pemakai ti beguna amat ke lalu nyadi sebagi ari juluk nengeri tu ti deka nyadi pemekal pemakai besai ngagai komuniti dunya.
Kepala Menteri, Datuk Patinggi Abang Johari Tun Openg madahka pengawa betanam betupi moden siti ari potensial besai ngambi dikemansang ba adap Utara Sarawak ke alai mayuh tanah bedau diperimba endur pengawa betanam betupi moden.
“Kita bisi dandang tanah ti besai lalu kedua, tanah tu ulih dikena endur ngemansangka pengawa betanam betupi moden lalu ketiga, adap Utara Sarawak bisi mayuh pematak dagang temuai nyengkaum rampa menua enggau peranak dia.
“Keempat, pengereja pengawa ditu ulih dilatih lalu enti sema kitai ngena chara pemansang moden, kitai ulih nambahka penatai pemisi rayat nyengkaum sida di menua pesisir,” ku iya lebuh bejadika Seminar Pemansang enggau Nyadi Ketuai Ungkup Ketuai Komuniti renggat nengeri di Hotel Pullman di Miri, ngalihari kemari.
Iya madahka Tanah Tinggi Bario ti tebilang enggau berau menua nya, nyadi siti kandang menua ti ulih dikemansang nyadi palan ngeluarka pemakai ti beguna amat ngena konsep betanam fertigasyen, seraya m adahka pengawa meli bilun kargo ke beungkus RM10 juta deka nyadi antara pelin strategi mutarka penanggul perengka pengangkut ke ditapi ba pengawa ngangkut produk betanam batupi ari menua pesisir.
Ku iya, pengawa ngaga jematan di Marudi, deka dilanchar Menteri Besai, Datuk Seri Najib Tun Razak pagila (sehari tu), deka muka jeman baru ungkup pemansang besai di kandang menua nya enggau mega ngagai Miri. Tu nyengkaum ngaga jalai terus ngagai Long Terawan sereta ngemuntangka komunikasyen kelebih agi ngagai palan pengeraja asal dunya, Taman Negara Mulu.
Ku Abang Johari, dikena nentuka semua pemansang tu mujur, semua rayat nyengkaum bala ketuai komuniti patut bejalaika pengawa sida.
Antara bala bisi datai iya nya Sapit Kepala Menteri, Datuk Amar Douglas Uggah Embas enggau Datuk Amar Awang Tengah Ali Hasan, Datuk Patinggi Dr. George Chan exSapit Kepala Menteri, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Dato Sri Fatimah Abdullah, Menteri Dagang Antarabansa enggau E-Dagang, Dato Sri Wong Soon Koh enggau Menteri Pelajar, Sains enggau Pansik Teknologi, Dato Sri Michael Manyin.
Sepenyampau 1,452 iku ketuai komuniti adap Utara Sarawak mungkur Bagi Manua Bintulu, Miri enggau Limbang udah ngulu seminar sehari nya, ke alai pengawa nutup seminar lemai tu deka dipenyadi Menteri Besai.