Bilik Operasyen BN sitak Kapit udah sedia napi PRU14
KAPIT: Bilik Operasyen Barisan Nasional (BN) P 215 Kapit udah sedia napi Pengawa Bepilih Besai Ke-14 (PRU14) ti deka datai dikena nentuka bulih pemujur besai.
Tagit ukai semina menang bepilih aja tang mega bulih majoriti besai, ti ngenataika pesan ke nyata ngagai perintah ke alai pengundi di Kapit deka meda ketuai mengkang dipegai chalun penyandang Datuk Alexander Nanta Linggi, ke mega Sapit Menteri Pemansang Menua Pesisir enggau Kandang Menua.
Nanta udah dipilih nyadi Sekretari Besai PBB maya Aum Besai Tiga Taun Sekali (TGM) parti berengkah ari 7 ngagai 12 Febuari tu tadi di Kuching. Iya nyilih Datuk Dr Stephen Rundi.
“Kami semua udah sedia napi PRU14 ti deka diatur sebarang maya berengkah ari diatu. Ngalihari tu (kemari), kami ngelancharka Bilik Operasyen BN sitak Parlimen P215 Kapit. Kami semua udah sedia gawa pengudah Menteri Besai Najib Razak ngetuka parlimen,” ku Jamit, ke nyadi Kaban Kunsil Nengeri (ADUN) Bukit Goram, lebuh bejadi bilik operasyen di ringkat satu, lot kedai di Jalai Penghulu Nyanggau ditu.
Ku iya, Aum Parlimen ke diatu deka tembu Hari Lima tu. Pia mega, udah nyadi hak Menteri Besai mantaika haribulan ngetuka parlimen. Nadai ngira bagi haribulan, Raban Pengawa Bepilih BN endang semua udah sedia gawa.
“Kami udah netapka tagit ukai semina menang bepilih aja, tang bulih majoriti besai, madah ngagai perintah ke alai pengundi di Kapit agi mengkang nyukung Datuk Alexander Nanta Linggi laban iya dipilih kami lalu kami pechaya amat iya ulih menang enggau majoriti besai,” ku Jamit nandu.
“Kami pechaya amat ulih nyapai tagit kami laban sentimen di menua tu ari renggat baruh rinduka Nanta lalu semua sida nyukung Nanta, nengah kerejasama rat ari raban Indu, Nembiak sereta Gempung Besai PBB.Sekali tu, kami bisi kerejasama penuh ari parti komponen BN. PBB gawa begulai enggau PRS, SUPP enggau PDP dikena nentuka kaban enggau penyukung sida bela sampal nurun ngundi Nanta,” ku Jamit nambah.
Bisi nyempulang Jamit iya nya chairperson Pampang Indu Bukit Goram Datin Angelina Celestine Ujang, chairperson Pelagus Puan Anita Anyan, chairperson Baleh Puan Minor Panyau enggau Ketuai Nembiak Bukit Goram Judson Jarrau antara kaban ke bukai.