CNS muji Najib ketegal ngamatka semaya
KUCHING: Kesatuan Kongres Pekerja-Pekerja Perkhidmatan Awam ( CUEPACS) Negeri Sarawak (CNS) temegah ati sereta meri puji ngagai Menteri Besai Datuk Seri Najib Tun Razak ti ngamatka semaya, meri Peniki Gaji Khas Ninting Taun (KKTG) ngagai semua 1.6 juta pengereja pengawa opis perintah di serata menua, berengkah 1 Julai tu.
Chairman CNS Ahmad Malie madah, pekara nya udah lama dikenataika Presiden CUEPACS ti dikearapka dibantaika sereta lalu bonus ke dipadahka maya mantaika Bajet 2018, ti dianti semua pengereja pengawa opis perintah di serata menua.
“Taja pia, YAB Menteri Besai tetap mandangka iya ngamatka semaya laban sehari tu (kemari) nyerumba ‘ Majlis Amanat Perdana Perkhidmatan Awam Ke16’ (MAPPA XVI) ke alai iya udah mantai inisiatif ti dianti pengereja pengawa opis perintah.
“Ngarika pengereja pengawa opis perintah ba nengeri Sarawak, CNS meri terima kasih ngagai YAB Menteri Besai lalu pia mega ngagai Perintah Nengeri ke diiring YAB Kepala Menteri Datuk Patinggi Abang Johari, ke alai CNS engka dipelaba deka nitihka singkang YAB Menteri Besai meri siti KKGT ngagai semua pengereja pengawa opis perintah nengeri baka ti dipejalaika YAB Menteri Besai.
“Reti nya sekali agi semua pengereja pengawa opis perintah deka nerima dua KGT (Khas Gaji Tahunan) sida dalam taun 2018,” ku iya madah ngagai Utusan Borneo, kemari.
Ahmad mantaika penemu nya lebuh dipinta meri pen- erang bekaul enggau pemutus Menteri Besai Datuk Seri Najib Tun Razak kemari ti mantaika peniki siti gaji ninting taun ungkup 1.6 juta pengereja pengawa opis perintah berengkah 1 Julai tu.
Najib ti mega Menteri Wang madahka beberapa inisiatif ungkup pengereja pengawa opis perintah enggau raban orang ke udah pinchin.
Entara inisiatif baka ngemandakka timpuh ‘time base’ kali kedua ‘Kumpulan Pelaksana’ ari 13 taun ngagai 10 taun; ngerembaika penguntung kereban perubat ngagai apai indai pegawai kontrak; ngungkupka belanja ngagai CUEPACS RM3 juta setaun.
Nambahka nya, kemisi nadai rikod 7 hari ngagai pengereja pengawa ti ukai bepengarap Islam ke tuju jalai pengarap; tambah 1 peratus niki pinchin ngena chara ‘one-off’ ngagai orang pinchin gawa perintah; ungkup geran khas RM1 juta ngagai gerempung orang pinchin gawa perintah enggau kuota haji khas ungkup orang pinchin gawa perintah.
“CNS nyambut manah inisiatif ke dibantaika Menteri Besai, ke pemaik enggau pengelantang semua pengereja pengawa opis perintah,” ku iya.
Kelimpah ari nya Ahmad ti mega nyadi presiden KGBS mega meri terima kasih ngagai Menteri Besai ti madahka ‘gred sisipan DG56’ raban pengajar ke udah ba gred DG54 pengelama 5 taun enggau penyulut, berengkah dikemeranka 1 Januari 2019.
“Berindik ari pekara tu, CNS enggau KGBS minta semua pengereja pengawa opis perintah terus nyukung perintah ke udah bisi diatu kelai terima kasih ngagai inisiatif ke udah dibantaika YAB Menteri Besai nyeruma MPPPA XVI ba PICC Putrajaya,” ku Ahmad.