Perintah deka nentuka rayat pupu bansa di nengeri tu ti bisi bemacham jalai pengarap ngerima pengelantang ti sebaka
SRIAMAN:Perintahnengeri chukup siruka peminta peranak di menua tu datai ari pupu bansa enggau jalai pengarap, kelebih agi ba peminta endur sembiang baka masjid, kuil enggau gerija.
Menteri Muda Pengelantang Komuniti Sarawak, Datuk Francis Harden Hollis madah nengeri Sarawak endang ngembuan penyelai laban ngemendarka peranak nengeri tu megai sereta ngemeranka pengarap sida empu.
Nya kebuah, sebarang bantu perintah sekalika nengah geran Projek Mit Pemansang Menua Pesisir (MRP) tauka Projek Transformasyen Menua Pesisir (RTP), perintah kitai ngemendarka bantu diberi ungkup pengawa pengarap baka geran dikena bejalaika aktiviti pengarap tauka projek fizikal ba ngemanah tauka ngaga rumah sembiang.
Perintah nengeri mega ku iya udah numbuhka siti unit baru di Opis Kepala Menteri ti ngintu pekara pengarap dikumbai Unit Hal-Ehwal Agama Agama Lain (UNIFOR) ti diketuai Direktor Datu Dr. Ngenang Janggu.
“Perintah mega udah ngelempaika tanggungpengawa ngagai Sapit Kepala Menteri, Datuk Amar Douglas Uggah ngambika ngintu pekara bekaul enggau pengarap bukai,” ku iya lebuh bejadika Begunan Baru Gerija Seventh Day (SDA) Sri Aman semak ditu, kemari.
Harden ke mega Kaban KUnsil Nengeri ( ADUN) Simanggang nerangka, rayat ditu chukup betuah laban sebarang isu enggau penanggul sereta peminta bantu enggau atur bekaul pengarao
Perintah mega udah ngelempaika tanggungpengawa ngagai Sapit Kepala Menteri, Datuk Amar Douglas Uggah ngambika ngintu pekara bekaul enggau pengarap bukai. Datuk Francis Harden Hollis Menteri Muda Pengelantang Komuniti Sarawak
nyadi raban Kristian nerima perati khas ari perintah enggau pemisi UNIFOR sereta siku menteri ti bisi tanggungpengawa.
Perintah udah ngagihka belanja khas tetiap taun ngagai raban UNIFOR dikena meri bantu projek tauka geran belalauka peminta enggau peneka raban gerija di serata Sarawak.
“ba aku empu, peminta bantu belanja ungkup aktiviti gerija tauka nyeleti tauka ngaga gerija enggau chapel nyadi pekara dikemerat aku ti nyadi pengari rayat ditu,” ku iya.
Sama bisi datai Presiden SDA Mission Sarawak, Pastor Denney Nebor, Pastor ti nyaga gerija SDA di sitak Sri Aman, Pastor Waltor, Ketuai Gerija SDA Sri Aman, Benjamin Radin, Chairman Komiti Pengatur Pengawa Bejadika Begunan Baru Gerija SDA Sri Aman, Felicia Tan Ya Hua sereta bala bukai.
Berebak enggau nya, Gerija SDA Sri Aman berengkah digaga kena 19 Mei 2016 lalu tembu kena 28 March 2017 nelan belanja manggai RM500,000.