Program Sejiwa Senada deka berengkah di Miri kena 7-8 April

MIRI: Program Sejiwa Senada ti tebilang datai baru taun tu lalu peranak ke diau di kandang menua Miri, Saratok enggau Kuching sereta kandang menua besemak deka bisi peluang baru ngulihka servis, pemadah enggau lalau ari ejensi perintah, kompeni ngaul perintah (GLC), gerempung ukai dikuasa perintah (NGO) ditambah enggau sektor peribit.

Di Miri, program deka diatur di Padang Majlis Bandaraya Miri berengkah ari 7 ngagai 8 April seraya di Saratok, iya deka diatur di Dataran Saratok berengkah 21 ngagai 22 April. Di Kuching, program nya deka berengkah diatur kena 28 ngagai 29 April.

Program di Miri deka mandangka lebih ari 100 bangsal ti nyediaka bemacham servis perintah, meri lalau, pengawa mandang, bejualka produk menua tu, pemakai enggau ai irup, panggau pemerindang sereta mega chabut tikit benasit ungkup bala pengusung.

Semua ketetiga palan nya disadang deka dipenyadi Kepala Menteri Datuk Patinggi Abang Abdul Rahman Johari Tun Openg.

Program Sejiwa Senada siti ari inisiatif perintah nengeri ngaul rat rayat ngagai renggat baruh (turun padang) ngemai begulai mayuh macham kunchi servis perintah, nya alai rambai jaku iya perintah begulai enggau rayat (Kerajaan Bersama Rakyat).

Pengusung benasit ti ngambi bagi ba chabut tikit benasit deka bisi peluang menang telefon binching, bisikal enggau produk elekterik. Nya alai tu peluang ngagai rayat ngiri penemu, beperindang sereta menang perais tikit benasit.

Program tu mega nyadi one-stop centre (Pusat Sehenti) ungkup perintah ke alai raban GLC, NGO sereta sektor peribit deka nyediaka mayuh bengkah servis enggau produk terus ngagai rayat lalu meri lalau enggau aktiviti bukai bala aktiviti lumba enggau rekreasyen, Dapur Sarawak enggau panggau pemerindang begulai enggau bala penyanyi menua tu enggau nasional.

Kelimpah ari nya nya, program tu mega nambahka pemanah ti diasaika rayat ngambika sida deka bisi pengandal ba pekara digaga perintah ngemai pemansang sereta nyungkak ekonomi rama sereta tikas pengidup rayat.

Iya mega siti chara dikena perintah nempa pemanah tanggam kaul enggau kerejasama enggau rayat sereta ngenegapka atur pengawa enggau pengelantang di nengeri tu.

Dalam taun 2016, ba program ke sama mujur matak 1.5 juta pengusung datai lebuhka diatur di serata nengeri. Mensia mayuh ditesau sampal datai lalu tama nadai bebayar.