Rikod BPHB bisi nambah ngagai 50.28 peratus dalam pengawa kargo ba 2017

MIRI: Rikod Bintulu Port Holding Berhad (BPHB) bisi tambah ba pengawa ngatur kargo sepenyampau 8.2 peratus iya nya 50.28 juta tan taun nyin tadi ari rikod 46.45 juta tan dalam taun 2016.

Ketuai Pemesai Eksekutif BPHB, Datuk Mohammad Medan Abdullah madahka pekara nya dijapai pemadu manah ba pengawa ngatur kargo raban nya kenyau ari mula operasyen di Palan Penyangkai Kapal Bintulu.

“Kami udah ngatur 10,000 kapal enggau kargo gis asli cecair (LNG) kenyau ari 1983 sereta ngatur kontena mungkur Malaysia Timur enggau 309,000 TEU,” ku iya rambau Pengerami Makai Lemai Ngenang Pemanah Pengawa Begulai Enggau Pelanggan di Miri, malam kemari.

Ku iya nambah, BPHB mujur ngatur 4.22 juta tan minyak sawit ngujungka raban nya pengatur terminal eksport pemadu besai produk belalauka minyak sawit di Malaysia iya nya 25.5 peratus.

“Pemujur tu asil kerejasama semua raban nyengkaum pemain industri, pelanggan, kaban dagang, sereta penyedia servis ti mai pemansang ngagai BPHB,” ku iya.

Mohammad Medan madah raban sida deka seruran fokus ngagai sektor pengerembai besai bukai sereta nambahka penyikar ngatur kargo.

Ba lansa bukai ku Mohamad Medan madah tu pengerami keterubah diatur di luar Bintulu pengudah atur pengerami ke sama di Bintulu dalam taun 2015.

Beserimbai enggau pengerami nya mega bisi nyuaka 18 iti anugerah ngagai kompeni tauka pemain industri, konteriktor enggau kaban stratregik BPHB.

Tu dikena ngenang pemanah pengawa bala pemain industri ti komited begulai enggau BPHB dataika raban nya nyapai beberapa pemujur dalam timpuh dua taun tu.

Berambaika jaku ‘Western Country and Rainforest’, nya digulu lebih 200 iku temuai ti bela ngerasuk pekayan ‘koboi’, mega diatur chabut benasit, main enggau pengawa belagu.