ASADIA chakah ngatur tujuh kelas main asal ngagai rebak baru
KUCHING: Akademi Serakup Dayak Iban Sarawak ( ASADIA) diatu benung chakah ngatur tujuh kelas main asal.
Ketuai ASADIA, Mabong Unggang madahka akademi nya meras deka ngetan sereta ngangkatka main asal raban bansa Dayak, kelebih agi ngagai rebak baru.
Iya berasai temegah ati meda agi mayuh raban bansa Dayak ke bisi pengerindu deka belajar seraya ngetan enggau ngerembaika main asal bansa diri.
“Naka ke diatu kami benung ngatur kelas main asal nyengkaum muka dua kelang kuntau, ajat indu, ajat lelaki, kelas betabuh, sape enggau gendang.
“Aku meri terima kasih ngagai semua ti berat amat deka belajarka main asal kitai bansa Dayak.
“Ari sambut pupu bansa Dayak ti rinduka main asal diri enggau bansa Dayak bukai, tu mandangka kitai ulih begulai sejalai nuju tuju ke sama,” ku iya madah ngagai Utusan Borneo.
Ambika banding ku iya, ba ASADIA bisi ngatur kelas belajar ajat bansa Kayan lalu pengajar ke ngajar ajat nya ari bansa Lahanan sereta orang ke belajarka ajat nya tebal agi bansa Iban enggau Bidayuh.
Berebak enggau tu lebuh ke ngenang pasal kelas belajar ngajat lelaki, iya madahka kelas lelaki nya kurang nerima sambut enti dibanding enggau kelas raban indu.
Mabong ngarapka orang lelaki ulih sama meras enggau raban orang indu belajarka main asal baka ngajat ngambika main asal nya enda punas.
“Laban enti kita udah nemu sereta bisi pengerindu, kita deka bisi ati ngasuh anak tauka raban rebak dudi nampung pengelandik enggau pengerindu ke main asal.
“Nengah chara tu mega main asal kitai baka ngajat, ulih pegari belama,” ku iya seraya meransang raban lelaki belajarka main asal Dayak.
Kelimpah ari nya Mabong meri puji sereta terima kasih ngagai bala menteri, menteri muda, kaban kunsil nengeri, kaban parlimen sereta ke bukai ti udah gerah jari mantu ASADIA ngangkat enggau ngerembaika main asal.
Penerang silik bekaul enggau main asal ke diatur ASADIA tau ditanya ngagai Mabong empu ba lumur 012- 6925562.