Komuniti balat enda ngasi enggau tagang bebuaika uras peneka ati
KUCHING: Pekara bebuaika uras ke enda nitih atur undang-undang di sitak Kuching Kuching Utara pedis endar dikemutarka.
Datuk Bandar DBKU, Datuk Abang Abdul Wahab Abang Julai madah penanggul nya agi nyadi ba sekeda sitak ‘hot spot’.
Berindik ari nya, iya minta kerejasama mensia mayuh mantu ngemutarka penanggul nya majak nyadi.
“Kami (DBKU) beratika penanggul bebuaika uras peneka ati ke enda nitih atur undang-undang nyau nyadi penanggul ke pedis endar dikemutarka.
“Berindik enggau nya, kami minta kerejasama ari mensia mayuh ke diau di mengeri enda bebuaika uras peneka ati sida, lalu enti ulih, komuniti mantu kami ngena talipaun binching sida iya ngambi gambar orang ke ngaga pengawa bansa nya,” ku iya.
Oya madah munyi nya lebuh dikerandau pengarang berita pengudah ngepunka Gempuru Ninting Bulan DBKU ke bulan April di Indu Opis DBKU, ditu kemari.
Sebedau nya ku iya, piak DBKU kala masang kamera litar tertutup (CCTV) di sitak ke selalu endur mensia mayuh bebuaika uras, tang pengawa bansa nya digaga ba endur bukai.
Lebuh nerang enggau silik agi, Abdul Wahab madah piak sida iya begunaka bukti ke tegut ngambika ulih endawa orang ke ngaga penyalah nya.
“Enti ditangka, sida tu ulih kena kompaun, nyengkaum mayar denda RM1,000 tauka diambi atur kort nengah genteran tusun ukum ‘Anti-Litter By Law’.
“Diatu nyauka semua kitai bisi talipaun binching pintar, enti komuniti ulih mantu meri pemadah, orang ke enda betanggungjawab nemu reti pengawa ke digaga sida iya dikemata ulih mensia mayuh,” ku iya.
Taja pia, iya madah, naka kediatu bedau bisi orang ke ditangkap ketegal ngaga penyalah nya.
Abang Abdul Wahab nandu baru madahk, sekeda sitak di Kuching Utara nyadi endur mensia mayuh bebuaika uras ke enda nitih atur undang-undang nyengkaum di Jalai Lubuk Kara enggau Jalai Pisang besemak enggau Kampung Kudei.
Sebedau randau nya, Datuk Bandar DBKU nyuaka Gelar 25 Taun udah Gawa enggau DBKU ngagai tiga iku penerima sereta tiga iku penerima setipikit meri puji ngagai pegawai ke deka bepinchin.