JKM bebendar deka mantu orang ti seranta ngangkatka tikas pengidup
SARIKEI: Kelimpah ari meri bantu, Opis Pengintu Pengelantang (JKM) mega nulung kaban ti berejista enggau opis nya chara dikena ngangkatka tikas pengidup sida ngambika menyana agi.
Nya alai Pemesai Pengintu Pengelantang, Tang Kee Lee ngelalau raban seranta ti bepanggai ba bantu ngerebut peluang ke bisi disediaka ungkup sida dikena mansutka sida ari tekul penyeranta.
“Siti ari peluang ke bisi disedia nengah Program Pemansang Runding enggau Motivasyen ti mai sida ngelala konsep dagang pemun,” ku Tang madah nyemetak.
Tang ti dikangau bejadika pengawa nutup sebengkah program bansa nya diatur Seksyen Pemansang Ekonomi JKM Sarikei di sebengkah hotel ditu, apin lama ke udah, pechayaka pesereta kus udah bulih penemu berega ari nya.
Nadai ngembuan penemu pasal pekara nya, kelebih agi raban seranta, tentu deka berunding dagang ukai semina chara ngulihka belanja aja ungkup idup, tang pengudah ngelala konsep dagang pemun, iya pechaya pesereta deka sedar sida mega ulih mujur ba pengidup enti sida bisi pengingin ngangkatka diri.
Tambah mega ku iya, opis nya mega nyediaka sida ti ditulung enggau bantu belanja ba Pengawa Ngelancharka Geran dikena ngepunka dagang sida, ku Tang, seraya nambah, pekara ti chukup manah ari Pengawa Ngelancharka Geran nya, sida enda ibuh mayar pulai.
Tu mega nyadi pengarap opis deka mega sida ti ditulung mansang dalam dagang sida lalu badu agi bepanggai ba bantu pengelantang ti mimit.
Sepenyampau 36 iku sida ti ditulung JKM udah ngulu kus dua hari berunggu nya.
Antara bala ke bisi datai Ketuai Seksyen Pemansang Ekonomi JKM Bagi Menua, Nyambar Ginda.