JAPEN Sarawak udah ngatur Program ‘ Taklimat Sivik 2018’ renggat mengeri di Sibu
SIBU: Opis Pemadah Malaysia Nengeri Sarawak udah ngatur Program Taklimat Sivik 2018 renggat nengeri Sarawak di Sibu, kemari.
Program nya dipunka enggau licha ari Pemesai Opis Pemadah Pelilih Sibu Rosman Zaini ti bekaul enggau ‘Negaraku’.
Nangkan licha nya, Opis Pengerai Sibu ti diarika Dr Norraliza Md Zain bekunsika isu bekaul enggau ‘Difteria’ lalu kepenudi licha bekaul ‘Jenayah Seksual Terhadap Kanak-Kanak’ ari piak polis ti diarika ASP Intan Subri enggau Inspektor Nor Ain.
Program tu dipenyadi Direkter Opis Pemadah Malaysia Negeri Sarawak Abang Sardon Abang Hashim ti diarika Pemesai Opis Pemadah Sitak Sibu/Mukah Ivy Stephen Sekai.
Ivy ba jaku iya madahka piak sida ransing deka bekunsi ngagai mensia mayuh nyengkaum niki rumah panjai bekaul enggau isu ke bisi nyadi.
Ku iya, pengawa sida tu bekempit enggau opis bukai baka opis Residen enggau Opis Pengerai Sibu.
Tuju licha tu diatur iya nya dikena opis enggau ejensi perintah bekunsika isu ke bisi nyadi maya hari tu.
Ba licha ‘Negaraku’, batang jurai bepelasarka ulah angkunka menua lalu isu ‘Difteria’ lebih agi bekenangka igi penyakit nya ke bisi nyadi empai lama enggau licha ari piak polis bisi ngelansa ulah nembiak bekenaka internet, penyalah ngenyati anak mit nengah seksual, chara apai indai matau pengawa anak bekenaka internet sereta pekara bukai ti bekaul.
Program tu kemari digulu bala Komuniti 1Malaysia (KIM) sereta bala tuai raban bansa ke bukai.