Fiesta NBOS ti keterubah deka digaga di Sarikei kena 13-15 April
SARIKEI: Festival Strategi Tasik Biru Nasional (Fiesta NBOS) keterubah di nengeri tu deka diatur di Sarikei, berengkah ari 13 ngagai 15 April.
Menteri Besai Datuk Sri Najib Tun Razak disadang deka datai bejadika pengawa ngelanchar program tiga hari berunggu kena pagi 14 April, pia ku Sapit Sekretari Nengeri, Datu Jaul Samion madah rambau aum pengarang berita pengudah ngetuai aum komiti pengatur di bilik konferen Opis Residen, ditu, kilah ensana.
Diatur begulai Opis Menteri Wang enggau perintah nengeri, fiesta tu deka mandang sereta ngelakuka mayuh bengkah servis enggau program dipungkal di baruh inisiatif NBOS ungkup peranak menua tu, ku iya.
Antara tuju inisiatif NBOS dikena ngangkatka gaya pengidup rayat dipejalai di nengeri ke alai ‘nyambung sida ti enda disambung’, Bekal Kuasa Karan Alternatif Menua Pesisir ( SARES), ngentak rumah ti digaga raban Bomba, bejualka barang diguna besehari sehari enggau rega mudah ari FAMA, Palan Transformasyen Komuniti Mindah Kin Kitu ( CTC) sereta mayuh ke bukai, ku iya madah nyemetak.
Nitih ku iya, lebih ari 100 ejensi perintah deka ngaul diri dalam fiesta, deka nirika bangsal ba laman besai ba mua palan sivik ditu.
“Fiesta tu iya nya inisiatif strategik NBOS nyediaka servis perintah nengeri nengah kerejasama mayuh beng- kah ejensi dikena ngelimat belanja enggau enda masau jam maya ngenataika projek,” ku iya.
Kelimpah ari nya, ejensi perintah ti ngaul diri deka nyediaka servis ba siti palan ungkup pengelantang mensia mayuh, ku iya nambah.
Bisi mega atur program bukai baka Lumba Rayat, Panggau Rayat enggau pekit lumba nerima penyereta ari mensia mayuh,” ku iya.
Ku Jaul, sida udah nesau urung 7,000 iku datai ngulu fiesta nya, tang dikearap deka meda mayuh agi orang datai laban tuju program nya kea mat ungkup rayat, kelebih agi, meri sida peluang ngasaika semua servis disediaka mayuh bengkah ejensi perintah.
Mensia mayuh mega bisi nasit menang perais ti diatur ninting jam maya atur fiesta tiga hari berunggu, ku iya, seraya nambah, perais tetiap jam iya nya hampers, perengka elekterik enggau ke bukai. Lalu dua perais besai iya nya motosikal, deka dichabut beserimbai enggau pengawa nutup kena lemai 15 April.
Ba lansa ke bukai, nitih ko penerang dikeluar komiti pengatur, antara aktiviti bukai deka diatur nyerumba program nya iya nya senam aerobik, berapi, karaoke, pekit seni enggau main asal, pengawa mandang, pengawa bejual ari bala komuniti, ngelakuka produk, pasar tani enggau ke bukai.
Mayuh bengkah ejensi deka meri licha pasal peluang dagang enggau licha pelajar Sains, Teknologi, Kejuruteraan enggau Matematik (STEM) ari Unimas, Klinik SPM enggau STPM ungkup bala nembiak sekula, kus pengelandik ungkup raban indu enggau program transformasyen ungkup bala ketuai renggat baruh.
Antara sida ke bisi datai iya nya State Federal Financial Officer, Mohd. Saiful Sungkih Abdullah, Direktor state Implementation and Monitoring Unit ( Simu), Abdul Rahman Sebli Senusi, Sapit Direktor Simu, Felicia Tan, Residen Sarikei Resident, Mohd Junaidi Mohidin enggau Injinir Bagi Menua JKR Sarikei, Teo Nguong Leong.