KPDNKK ngelalau kunteriktor ulih diketu kuntrik enti enda tetitihka atur
MIRI: Pengawa milih kuntriktor nengah Program Pengangkut ( Transporters Programme) Opis Dagang Dalam Menua, Gerempung Kerejasama enggau Pekara Bebeli Barang (KPDNKK) MDTCC) deka dipilih nengah atur ke terit agi, ngambika semina kunteriktor ke bisi pengulih deka diberi kuntrik nya.
Sekretari Besai KPDNKK Dato’ Sri Jamil Salleh madah pekara tu berat laban opis menteri nya enggai ngembuan kuntriktor ke nadai penau sereta meri kualiti servis ke enda manah ngagai rayat.
“Kami betatika pekara tu, laban (lebuh bisi penanggul) aku ke nyaut Opis Audit enggau Opis Pengawa Nagang Makai Suap (SPRM), ukai sida pengangkut,” ku iya madah lebuh bejaku ba atur pengawa Nyuaka Kunterik Pengangkut KPDNKK sereta Danji Enda Makai Suap ( Presentation of MDTCC Transporters Contract and Corruption- Free Pledge ceremony) di palan Institut Pengawa Latih Industri di Miri, kena malam hari Tiga tu tadi.
Sama bisi enggau ngulu atur pengawa nya, Direktor KPDNKK Menua Sarawak, Datuk Stanley Tan enggau Sapit Direktor Menua SPRM, Zulhairy Zaidel.
Jamil madahka, berindik ari tu ila, iya deka meda pemanah program tu nyengkaum nyeliah ari penanggul baka barang ke dianjung enda chukup, barang ke dianjung ngagai salah endur tauka pengangkut enda nitihka atur nyadi baru, baka taun ke udah.
“Aku nemu penanggul bansa tu agi bisi nyadi taun nyin tadi. Nyadi penagngkut, bisi atur ke patut dititih, tang kami agi nerima komplin ari mensia mayuh.
“Ketegal tu, nama direktor kami ke kena panggil maya dipansik SPRM, taja pan direktor kami nadai nerima sebarang pampas ari pengangkut.
“Tang, SPRM enda tau enda ngaga pansik sida iya enggau silik ba pejalai penagngkut di Sarawak, lalu kami tu ke besaut ngagai audit. Pemesai kami ke nadai besangkut paut enggau pekara tu (pengangkut) pan sama kena tasat.
“Nya alai, ke taun tu, aku minta semua pengangkut nitihka atur tu enggau terit. Semua barang enda tau enda dianjung nitihka penyampau ke udah ditetapka opis menteri lalu enda tau enda datai ba endur ke betul,” ku iya.
Iya mega ngelalau pengangkut ke enda nitih atur kuntrik, iya nya opis menteri nya deka ngetuka kuntrik sida iya tekala nya.
“Tu jaku lalau ngagai semua pengangkut ke enda nitihka atur kuntrik. Aku enda bebagi ati deka ngetuka kuntrik sida iya tekala nya.
“Opis Menteri kami nadai besangkut paut enggau pengawa tu, tang laban enti kami enda ngetuka kuntrik sida, pegawai kami ke ngemutarka pekara nya deka diketuka. Aku enggai pegawai kami diketuka baka nya ketegal pengangkut ke enda nitihka atur,” ku iya.
Ba jaku iya mega, Jamil madah kuntrik ke udah diberi enda tau enda direjista enggau ‘e-Perolehan’, ke nyadi siti atur ke diguna ke semua pembekal ngaga pesan barang ngagai Perintah Besai. Sida ke lalu bedau ngerijista sida iya empu, diberi timpuh enam bulan ngaga pengawa nya.
“Enti semua atur tu di- titih, aku besemaya, kuntrik kita deka digaga baru ujung taun tu. Enti enda, kami deka ngemasukka nama kita ‘blacklist’.
“Enti kita (pengangkut) enda ulih nitih atur tu, padah ngagai kami ngambika kami ulih ngetuka kuntrik kita diatu,” ku iya.
Jamil madah perintah melanja urung RM100 juta setaun ke program pengangkut di Sarawak aja, lalu enti program tu enda mujur, pemerat tuju iya enda ulih dijapai, lalu iya mega masau wang turu.
“Misi perintah, iya nya ngambika komuniti di menua pesisir bulih barang sereta utai ke diguna sida ninting hari enggau rega ke sebaka enggau di mengeri, enda ulih dijapao enti program nya enda mujur,” ku iya, lalu madahka ketegal tu mega, empas iya ngerusakka nama perintah.
Sebedau bisi program pengangkut tu, rega barang di sitak menua pesisir jauh mar ari mengeri labak kos pengangkut disengkaum dalam rega barang. Nengah program pengangkut KPDNKK tu, bayar pengangkut diberi subsidi Perintah subsidi.