Tu mega pelasar dikena nempa pedagang baru teulihka pemujur
KUCHING: Program Tabung Ekonomi Gagasan Anak Bumiputera Sarawak (TEGAS) Pre-Accelerator Bootcamp nyadi pelasar nempa orang dagang baru ke mujur.
Chairman TEGAS Datu Len Talif Salleh madahka inisiatif ngatur program nya senipak enggau agenda Kepala Menteri Datuk Patinggi Abang Johari Tun Openg ke deka nambahka pemayuh orang dagang ti mujur sereta nuju ekonomi digital nengeri.
“Program tu diatur pakar industri ke ngajar pesereta pasal topik baka pemansang penguna enggau produk, nempa tim, ngumpul duit sereta nyual tauka ngelakuka penemu.
“Ari bootcamp tu, misyen kami endang nyendiaka peluang ngemansang diri ngagai serikat pemungkal tumu sereta nempa komuniti serikat pemungkal ti kering tauka tegap di Sarawak.
“Inisiatif tu sebaka enggau agenda Kepala Menteri ti deka nambahka penyampau orang dagang ti mujur lalu ari nya ngemansangka ekonomi digital di menua tu,” ku iya.
Len mansutka pekara nya lebuh bejaku maya ke datai ngemataka pengawa mandangka penemu ba TEGAS Pre-Accelerator Bootcamp ba TEGAS Digital Innovation Hub ditu, kemari.
Bisi 14 ari 20 serikat
Ari bootcamp tu, misyen kami endang nyendiaka peluang ngemansang diri ngagai serikat pemungkal tumu sereta nempa komuniti serikat pemungkal ti kering tauka tegap di Sarawak. Datu Len Talif Salleh Chairman TEGAS
pemungkal tauka ‘startups’ udah dipilih mandangka penemu bedagang ba program nya.
Entara 14 serikat pemungkal nya baka Trifold Enterprise, Codelab Academy, Thrist Milkshake, Canada Restaurant, Wangi Lai Plt, Traver technologies, Teech, Menur, Majoh!, Sluvi, Food Hero, TRIBE, Ai-Key enggau Team Rocket.
Program nya berengkah Hari Minggu nyin tadi, dikena mantu orang dagang baru ngepunka dagang ngena penemu ti ulih dikena ngagai nyadi produk ti ulih maju.
Len ngarapka bisi serikat pemungkal ti mujur nyadi ari bootcamp tu ila.
“Kembuan pengeliat ati enggau pemerani ngambika juluk ati ulih dijapai. Enti deka mujur dalam dunya ti ngemeratka pemela, nuan patut mansutka individualiti nuan,” ku iya seraya ngelalau raban 14 serikat pemungkal nya.
Sama datai ngemataka pengawa mandangka penemu nya Sapit Chairman Datuk Dr Jerip Susil ke mega Menteri Muda Perengka Pengangkut, Sapit Sekretari Perintah Nengeri Datu Dr Sabariah Putit enggau ke bukai.