Opis Menteri Pelajar dipinta beratika pekara tu laban sistem nya balat nating tanggungpengawa bala pengajar
MIRI: Opis Menteri Pelajar (KPM) dipinta mansik baru pejalai sistem ngisi penerang diperati nyadi siti pekara ti nating bala pengajar dataika ngachau batang pengawa ngajar enggau nyeridi.
Menteri Muda Dagang Temuai, Seni enggau Main Asal, Datuk Lee Kim Shin madah iya nerima mayuh sebana ari bala pengajar ditu enggau Limbang, jam sida mayuh tebasau enggau kereja ‘pengkeranian online’ enti nitih awak nya manah agi dikena nembika kereban dikena ngajar.
“Bala sida (pengajar) sebana mayuh awak tebasau ba mua komputer ngemasukka bemacham bansa penerang, aplikasyen komputer baka ‘Pentaksiran Berasaskan Sekolah’ tauka PBS,” ku iya rambau Aum Besai Ninting Taun (AGM) Serakup Pengajar Sekula Bansa China enggau Limbang Sarawak ditu, kemari.
Kaban Kunsil Nengeri (ADUN) Senadin nya madah, antara agenda aum bisi mega nyebut bala pengajar di sekula bansa China ditating sistem ngisi penerang ti diasaika ngenusahka sida.
“Berindik ari nya, aku minta Serakup Pengajar Sekula Bansa China enggau Limbang Sarawak nulis siti memorandum disempulang enggau perambu ngemuntangka pengawa ngisi chuan penerang ke bisi diatu.
“Memorandum nya deka dibai aku ngagai opis menteri pelajar ngambi atur patut dipejalai,” ku Lee.
Dulu agi ari nya, iya ngelalau bala kaban serakup ngambi ngena chara kreatif agi maya sida ngajar.
“Aku dekaka bala nembiak belajarka pekara enggau penemu baru, kreatif sereta relevan enggau ubah kemaya hari.
“Nya alai, dikena nyapai tagit tu, bala pengajar ukai semina patut kreatif tang mega nguasa pengelandik ngena teknologi tinggi,” ku iya.
Berebak enggau pengawa nya, Lee bisi ngemendarka agih belanja sepenyampau RM20,000 ungkup serakup nya dikena ngatur latih kreativiti.
Sama bisi datai Chairman Serakup Pengajar Sekula Bansa China enggau Limbang Sarawak, Lai Cheo Tian enggau Ketuai Nembiak Parti Sa’ati Rayat Sarawak (SUPP) Piasau, Aeries Leong.
Bala sida (pengajar) sebana mayuh awak tebasau ba mua komputer ngemasukka bemacham bansa penerang, aplikasyen komputer baka ‘Pentaksiran Berasaskan Sekolah’ tauka PBS. Datuk Lee Kim Shin Menteri Muda Dagang Temuai, Seni enggau Main Asal