Akta Anti Berita Pelesu engkeman dikena nentu pengelikun komuniti

LIMBANG: Pengawa ngemendarka Akta Anti Berita Pelesu ulih nagang ulah naburka petenah ti majak ngerembai di menua tu.

Penyandang penuduk Parlimen Limbang Hasbi Habibollah madah ulah naburka petenah kelebih agi ba media rama tau ngeruga pengelikun ngagai bala komuniti kemaya hari.

Ku iya, pekara tu tau ngasuh rayat jampat pechaya pia aja nadai nemua pengamat maya berita nya dikerembai.

“Akta Anti Berita Pelesu engkeman amat dipejalai berindik ari kelalu mayuh petenah enggau cherita bula ditabur.

“Antara iya, bisi raban nadai tanggungpengawa ti nuduh Malaysia bangkrap kelimpah bemainka isu sensitif bukai,” ku iya rambau Gema Gegar Sukses di Masjid Baitul Iman malam kemari.

Sama bisi datai Residen Limbang Ir Ahmad Denny Fauzi, Pemesai Opis Agama Islam Bagi Menua Ustaz Awang Abdul Rahim Awang Rosely, Chairman Gerempung Pengajar Bumiputera Sarawak (KGBS) Pampang Limbang Jeffry Mail, Prinsipal SMK Agama Limbang Ustaz Zaini Hasbollah sereta bala bukai.

Hasbi dekaka pengawa begunaka teknologi gajet dipatau memanah.

Ku iya, ulah gian gajet kemaya hari ngasuh balat irau.

“Bisi apai indai ngelimpangka mayuh awak enggau gajet dataika sida enda kiruhka tanggungpengawa ba ruang bilik,” ku iya nambah.

Berebak enggau nya, raban Islam patut bejejaga enggau hadis enda betul di laman rama tu tau ngasuh saru akidah.

Lebih 200 raban Islam nedat Masjid Baitul Iman meda konsert Gema Gegar Sukses diatur begulai Serakup Apai Indai enggau Pengajar (PIBG) SMK Agama, KGBS Pampang Limbang, Komiti Mendam Pengerami Islam enggau Lembaga Amanah Kebajikan Islam Limbang.

Raban nasyid tebilang menua tu, Hijjaz enggau imam muda Nazrul Izwan mega bisi merindang rambau konsert nya.