Perintah Besai mengkang ari baruh pegai BN pengudah PRU14: Masing

KUCHING: Presiden Parti Rakyat Sarawak (PRS) Tan Sri James Masing pechaya Perintah Besai ti diarika Barisan Nasional(BN) mengkang deka megai perintah pengudah tembu Pengawa Bepilih Besai ke-14 (PRU14).

Ku iya, gempung penyakal iya nya Pakatan Harapan(PH) enda ulih ngalahka BN baikka nya ba renggat menua tauka renggat nengeri.

“Enda, aku enda pechaya Perintah Besai Barisan Nasional ( BN) deka alah, BN deka mengkang megai perintah,’ku iya lebuh dikerandau pengudah pengawa ngelanchar Manifesto BN Sarawak ditu, kemari.

Berindik enggau nya iya ngelalau parti penyakal di nengeri tu kelebih agi Parti Tindakan Demokratik(DAP) nyereta BN.

“Nadai jalai DAP ulih ngereja sebarang pengawa ditu lalu pekara tu aku nyamin.

“Manah agi sida( DAP) nyereta gempung BN ungkup pemaik rayat enggau nengeri.

“Kitai begempung ungkup pemaik peranak Sarawak, nya aja,’ku iya ke mega Sapit Kepala Menteri.

Masing nambah tu mih maya gempung penyakal nyereta BN Sarawak ngambika pinta enggau peneka perintah sereta rayat kelebih agi ba pekara ke bekaul enggau Sempekat Malaysia 1963 ulih dikemujur enggau lengkas.

“Gempung besai tu tau nganjung jaku tangkan ngagai Perintah Besai. Kitai begempung ungkup pemaik peranak Sarawak,’tandu Masing.

Ungkup Presiden PDP Datuk Seri Tiong King Sing, manifesto BN Sarawak ukai semina dikena nginti undi rayat tang ke pemadu berat dikena ngemansang Sarawak.

Ku iya, perintah nengeri meratka pinta enggau peneka peranak Sarawak.

‘Manifesto mega beratka pengawa nambah sereta ngangkatmanah perengkaguna di serata nengeri,’ku Tiong.

Abang Johari di Indu Opis PBB ngelanchar Manifesto BN Sarawak ti nungkatka rambai jaku ‘Ngemansang Sarawak Nengah Ekonomi digital’.