PRU14 majak diasai ba sitak Puncak Borneo
KUCHING: Renga pengawa bepilih majak berasai di Puncak Borneo kenyau ari Parlimen dipadam kena 7 April.
Kena malam Hari Minggu, Majlis Bipajak PBB Youth’ ungkup Zon 3 udah diatur di Balai Komuniti Kpg Seratau, dipechaya nyadi pengerami besai keterubah diatur pengudah pengawa madam dibantai.
Raban Nembiak PBB Zon 3 datai ari pampang Opar, Tasik Biru, Serembu, Mambong, Tarat, Bukit Semuja, Kedup enggau Tebedu.
Gempuru besai diatur raban nembiak PBB besai udah dipenyadi penyandang MP Puncak Borneo Datuk Seri James Dawos Mamit, mega udah digulu Ketuai Nembiak PBB Gerald Rentap Jabu enggau Sapit Ketuai Miro Simuh, Kaban Kunsil Nengeri (ADUN) Layar enggau Serembu, sereta ADUN Bukit Semuja John Ilus.
Bala ketuai nembiak ari mayuh bengkah pampang dalam Zon 3 sereta parti komponen bukai mega bisi datai.
Siang Prede, Sekretari Peribit Dawos, Sapit Residen Kuching Tuah Suni enggau Jeannoth Sinel, ti ngarika ADUN Tarat Datuk Roland Sagah Wee Inn, ke alai nama sida udah disebut nyadi chalun ke tau nyilih Dawos mega bisi datai.
Dawos lebuh bejaku ba mua mayuh rambau gempuru nya madahka iya agi nyadi chalun ungkup penuduk nya sebedau chalun baru dibantai.
Ku iya, iya udah berandau enggau Menteri Besai Datuk Seri Najib Tun Razak apin lama ke udah lalu udah dipadah sekeda penyandang ti kering sereta pegari nama, lalu bisi peluang besai menang engka deka dichalunka Najib baru ba pengawa bepilih besai ti deka datai.
Dawos mega ngansak raban nembiak PBB bejalaika tanggungpengawa sida nentuka Barisan Nasional (BN) menang maya PRU14 tu.
“Raban Nembiak PBB nyadi ‘bujang berani’ meseti bejalaika tanggungpengawa nentuka BN menang maya pengawa bepilih ti deka datai,” ku iya, seraya nambah, raban nembiak PBB meseti mega bejalai gawa ngagai renggat baruh betemu enggau rayat sereta meretika peminta enggau juluk rayat.
Ku Rentap, rayat patut malas baru pekara udah digaga perintah BN dikena ngemansang nengeri tu, ba pekara rama enggau ekonomi.
Ku iya nambah, kuing nengeri tu jemah deka ditentuka di baruh perintah BN.
“Ba pengawa bepilih ti deka datai, parti komponen (BN) meseti gawa begulai nentuka pemenang nya,” ku iya madah nyemetak.
Miro nyemetak madahka penyerakup enggau penaluk meseti seruran bisi dibantaika antara bala kaban nembiak, seraya nambah, bala kaban nembiak dipinta ngenegapka BN ba pejalai politik sida.
Berebak enggau nya, Dawos lebuh bejadika biro indu enggau kelab nembiak Kpg Bratan kena malam Hari Enam, madahka pengawa bepilih besai ti deka datai ukai pengawa ti mudah ngagai BN berindik ari parti politik baru diketuai ex-Menteri Besai Tun Dr Mahathir Mohamad enggau Datuk Seri Shafie Apdal.