Riot Jaem arap endar iya agi dichalun BN baru

SERIAN: Dato Sri Richard Riot Jaem arap endar iya agi dichalun Barisan Nasional ( BN) baru ngetanka Serian ba Pengawa Bepilih Besai Ke- 14 ( PRU14) ti deka datai taja berita selebubu majak dikerembai dalam sitak nya.

Bejaku ba pengawa nyuaka geran Projek Mit Pemansang Menua Pesisir (MRP) di Balai Mayuh Guna Ranchan semak ditu kemari, ku iya, iya nemu berita selebubu ti ngumbai nama iya udah ditingkil lalu disilih enggau orang bukai.

Seraya tuchum bejaku ba mua mayuh, iya madahka nama iya bisi dalam lis lalu madah ngagai sida, ke alai iya udah nemu sapa bagi chalun BN ungkup Serian.

“Bisi sekeda raban udah naburka berita madahka Richard Riot enda deka dichalunka baru. Kitai semina nganti hari mantaika nama ti dibantaika Menteri Besai tauka Kepala Menteri.

“Aku udah nemu sapa bagi dalam lis nya. Nya kebuah tuchum aku diatu, kita patut nemu sapa orang nya,” ku iya.

Sebedau pengawa madamka parlimen, Riot iya nya Kaban Parlimen Serian pengelama enam penggal.

Iya Keterubah endar menang ba penuduk Serian dalam taun 1990 nyadi chalun ngatika diri taja pan iya maya nyanyadi kaban Parti Bansa Dayak Sarawak (PBDS) ke udah dikinsil diatu.

Tiga taun udah nya, iya nyemilik Parti Sa’ati Rayat Sarawak (SUPP) ke alai iya diatu nyadi sapit presiden.

Iya ngetanka penuduk nya ari taun 1995 enggau majoriti betambah tetiap kali bepilih, enggau majoriti ke pemadu besai dijapai iya maya PRU13 2013 , lebuh iya menang enggau 19,494 undi majoriti ngelaban Edward Luak ari DAP.

Riot pechaya orang ti ngelaban di Serian engka chalun ari DAP baru.

Iya minta bala pengundi di Serian anang mendingka jaku ngapa ari penyakal, tang nentuka BN menang enggau majoriti besai.

“Anang ngambi mudah mikir penuduk Serian tu likun. Aram bekerejasama nentuka BN ukai semina menang di Serian aja, tang mega menang enggau majoriti ti besai. Enti ulih, gaga nyentukka chalun DAP lenyau chengkeram.

“Ari pemujur menang besai, Serian deka bisi sada ke nyaris agi didinga lalu perin- tah besai deka meri mayuh agi perati ngagai Serian,” ku iya.

Riot mega nyemetak madahka rambai jaku BN iya nya Begulai Enggau BN Nempa Serian Manah Agi.

Ku iya, Serian deka nyadi manah agi nengah pengawa bejalaika mayuh projek pemansang ke diatu benung dipejalai nyengkaum pengawa ngaga komplek endur bejalaika pengawa menua, palan konvensyen enggau pasar baru Serian.

Iya nyemetak madahka Datuk Seri Najib Tun Razak udah ngabas Serian enam kali dalam kandang kurang ari 10 taun kenyau ari nyadi Menteri Besai, tang Chairman Pakatan Harapan Tun Dr Mahathir Mohamad nadai kala ngabas Serian sekumbang iya mangku pengawa nya.

Ba atur pengawa nya, nyauka manggai RM2.2 juta geran MRP udah disua ngagai 113 penerima ari serakup, kelab enggau komiti genturung pendiau (JKKK).

Sama bisi datai Sapit Residen Serian, Mastapa Junaidi, Pemesai Pelilih Serian Lim Hock Meng, Sekretari Kaunsil Pelilih Serian Constantine Jonas sereta bala ketuai komuniti. KUCHING: Ketuai Bagi Nembiak Barisan Nasional (BN) Nengeri netapka BN nagit menang ba semua 31 penuduk ba Pengawa Bepilih Besai Ke-14 (PRU14).

“Kitai nadai tagit bukai kelimpah deka menang ba semua penuduk ba pengawa bepilih tu.

“BN enda deka alah, lalu kitai deka menang besai,’ku iya lebuh dikerandau pengudah pengawa ngelanchar Manifesto Barisan Nasional (BN)Sarawak di Indu Opis Parti Pesaka Bumiputera Bersatu(PBB) ditu, kemari.

Ngenang sentang manifesto ke dibantai Chairman BN Sarawak Datuk Patinggi Abang Johari Tun Openg nya, Rentap madah manifesto nyendia mayuh peluang ngagai raban nembiak.

Ku iya, BN nyendia pengelantang ba pekara internet sereta ekonomi digital ngagai semua peranak Sarawak kelebih agi raban nembiak.

Berindik enggau nya, iya ngelalau raban dalam gempung penyakal datai nyereta BN.

‘Enti kita (penyakal) per- anak Sarawak, aram begempung kitai bela ngemansang Sarawak,’ku iya.

Ungkup Sapit Ketuai Bagi Orang Indu BN Dato Sri Rohani Abdul Karim, manifesto serak tu chukup inklusif.

Reti nya ku Rohani nadai siku pertanak nengeri tu deka dikelaung ari semua program pemansang.

“Ari anak mit nyentuk ke raban nembiak sereta orang tuai, semua disengkaum lalu nya dipasuk dalam manifesto BN menua enggau BN Nengeri,’ku iya.

Iya nambah BN Sarawak deka menang besai ba PRU14 ketegal gempung penyakal nadai chara ngelaban BN serak tu.

Ngenang sentang Chairman Pakatan Harapan (PH) Menua Tun Dr. Mahathir ti deka nguluka gempung penyakal ba PRU14 sereta kala nyadi ketuai iya(Rohani) dulu suba, Rohani madah tetap deka ngelaban.

“Diatu iya(Dr. Mahathir) ngarika parti bukai, kitai nadai pilih bukai lalu tetap deka ngelaban.