Penumbuh KK Sibu nentuka juluk Revolusyen Industri 4.0 ulih dijapai
SIBU: Penumbuh Kolej Komuniti (KK) Sibu ngemujurka agi juluk ati nengeri tu ngelawa tuju Revolusyen Industri 4.0 sereta nempa mengeri Sibu nyadi endur ‘Hab Pelajar’.
Ketuai Direkter Opis Pelajar Politeknik Enggau Kolej Komuniti Profesor Dato Dr Mohd Ismail Abd Aziz madah, KK Sibu tu iya nya Kolej Komuniti ke tujuh ba nengeri Sarawak.
Penyampau KK ba nengeri tu ku iya deka nambahka agi pemayuh akses palan latih pengelandik ba Sarawak.
“Penumbuh KK Sibu tu bela ngembuan tuju deka nyediaka program latih enggau pengelandik ngagai bala komuniti ba sitak tengah lebih agi baka di Sibu enggau menua ke besemak.
“Kolej tu mega deka ngemuntangka bala apai indai nganjung anak sida nampung pelajar ba pelajar latih teknikal enggau pelajar vokasional (TVET).
“Nya alai, tu seririh bendar enggau tuju nengeri tu ti deka ngemeratka Revolusi Industri 4,” pia ku iya madah.
Iya mantaika pekara nya maya Pengerami Bejadi KK Sibu ti dipenyadika Menteri Dagang Antrabansa enggau E-Dagang Dato Sri Wong Soon Koh ditu, kemari.
Wong maya tu diarika Chairman Opis Servis Komuniti UPP Sibu Dato Andrew Wong.
Naka ke diatu Sarawak bisi KK Kuching, KK Mas Gading, KK Santubong, KK Betong, KK Sarikei enggau KK Miri.
Mohd Ismail madah, kenyau ke ditumbuh 17 taun ke udah KK pemesai reti KK majak ditemu mensia mayuh.
Iya madah, kelimpah nyedia ka Program Sepenuh Masa KK mega udah diangkat nyadi Hab Pembelajaran Sepanjang Hayat (PSH).
“Mayuh bengkah program pelajar, latih enggau kus disediaka ba ditu.
“Tu engkeman dikena meri awak belajar sereta nyediaka kus ngagai komuniti lalu ngangkatka pengelandik, penemu enggau penatai pemisi,” ku iya madah baru.
Kolej tu ku iya deka semampai ngembing komuniti enggau pengawa dagang baka nyediaka kus E-Usahawan, E-Rezeki enggau Pengurusan Perniagaan kelimpah kus bekaul ke bukai.
“Nengah tu KK deka nempa orang dagang di Sarawak ti setipak bendar enggau juluk SCORE iya ke deka ngemansangka menua peaisir sereta ngemunaska penyeranta ari chara nyediaka awak gawa enggau nyungkak penatai pemisi rayat,” pia ku iya.
Mohd Ismail madah, taja bayar ngambi kus murah tang sida ke udah belajar ditu endang bulih penemu ti betikas tinggi.
Tu ku iya ulih dipeda nengah rikod 96.7 peratus sida ke udah belajar dia deka bulih kereja.
Iya mega madah, sekeda ari pemujur ke udah ditempa KK iya nya mujur KK Kuching bisi nama ba Malaysia Book Of Record nengah Program Kek Lapis Terpanjang Di Malaysia taun 2017 tadi.
KK Sibu bela bisi nyediaka Sijil Pelancongan enggau Pengembaraan.
Pagi kemari mega, 200 iku udah ngambi tujuh kursus (Kursus Pendek) iya nya Kursus Masakan, Kursus Jahitan enggau Kursus Dandanan.