Kerejasama komuniti enggau bala nembiak berat ngemunaska gian dadah
SIMUNJAN: Paruk sereta kerejasama komuniti beguna endar ngambika pengawa ngemunaska gian dadah ulih digaga enggau mujur.
Pekara tu dipadah ulih Kaban Kunsil Nengeri ( ADUN) Simunjan Awla Dris ke madahka enti nadai paruk sereta kerejasama ari komuniti kelebih agi bala nembiak, semua pengawa ke digaga Perintah ngemunaska pengawa salah gian dadah nyangka enda ulih dijapai.
Iya madah, Kimpin ‘Perangi Dadah Habis-habisan’ udah dipadah ulih Sapit Menteri Besai Datuk Seri Ahmad Zahid Hamidi maya Nyambut Hari Anti Dadah Kebangsaan di Lawas, kena 28 Februari 2016.
“Pengawa tu enda ulih dijapai enti nadai kerejasama komuniti kelebih agi bala nembiak kitai.
“Nya alai, aram meh kitai meri sukung ke tegut dalam tetiap program ke digaga ulih Ijinsi Antidadah Kebangsaan (AADK) ke nyadi ijinsi pengatur dalam pengawa kitai beratika pengawa ngemunaska gian dadah ulih dijapai enggau mujur,” ku iya.
Iya madah munyi nya lebuh bejaku nutup atur pengawa Program TOT Combat DAPS ti digaga ulih AADK Samarahan enggau Simunjan di Dewan Mesra Simunjan ditu, kemari.
Dalam jaku iya mega, iya madah program tu ngipak endar enggau pemerat kemaya hari tu dalam pengawa ngemunaska penyai dadah.
Iya nandu baru madahka, dalam pengawa nya,komuniti enda tau enda diberi penerang bakani ku pengawa gian dadah nya, pengawa ke enda likun sereta tau nganu pengerai.
“Kelimpah ari nya, iya madah penemu bekait enggau pemerat gian dadah patut suah agi diangkatka ba komuniti nyengkaum pemesai ba pun menua, tanggungpengawa dalam merambu, bejalai sereta ngaga program meri penemu nagang pengawa gian dadah, ngubat enggau ngerai di dalam komuniti .
“Pemerat bansa tu tentu ulih digaga enggau penyereta semua raban komuniti ke tegap enggau pemerat pemanah pendiau, adat sereta ngembuan penegap pengarap,” ku iya.
Sama bisi enggau ngulu atur pengawa nya, Menteri di Opis Menteri Besai Datuk Seri Nancy Shukri, Direktor AADK Sarawak Wan Madihi Wan Salleh, Pegawai Pelilih Menua Simunjan Abdul Khalid Manap enggau pengari ari Opis Residen Samarahan Sayed Kadir Abdul Wahab.