DAP deka nganjung chalun di 9 penuduk, PKR (16) lalu AMANAH (6)
K U C H I N G : G e m - pung penyakal, Pakatan Harapan( PH) Sarawak deka nyatup Barisan Nasional(BN) Nengeri di semua 31 penuduk parlimen rambau Pengawa Bepilih Besai Ke-14(PRU14).
Bejaku ba aum pengarang berita di Indu Opis DAP di Kuching kemari, Chairman PH Sarawak Chong Chieng Jen madah DAP deka nganjung chalun di 9 penuduk, PKR 16 lalu AMANAH 6 penuduk.
Chong nambah agih penuduk nya diputus bepelasarka pengering tetiap parti dalam gempung PH Sarawak ba tetiap penuduk parlimen.
“Kitai udah ngadu aum bejuraika sentang agih penuduk lalu disetuju ketuai ari ketetiga parti dalam gempung tu,’ku iya.
Dulu agi ari nya Chong ngulu aum PH Sarawak ke bela digulu Chairman Parti Keadilan Rakyat(PKR) Sarawak Baru Bian enggau Chairman AMANAH Sarawak Fidzuan Zaidi.
Ba sentang isu Miri, Chong ke mega Chairman DAP Sarawak madah penuduk nya sigi ungkup PKR lalu deka diarika chalun ari PKR ba PRU14.
“DAP Sarawak deka meri sukung ngagai sapa aja chalun ari PKR ba penuduk parlimen Miri,’ku iya.
Iya netapka rintai nama chalun ngarika PH Sarawak deka dipansut pengudah Komiti Pengawa Bepilih( SPR) netapka maya ngantung nama chalun enggau hari muai undi PRU14.
Semilan penuduk parlimen ungkup DAP iya nya Mas Gading, Serian, Stampin, Bandar Kuching, Sibu, Lanang, Sarikei, Bintulu enggau Kapit.
PKR deka nganjung chalun di 16 penuduk iya nya di sitak parlimen Miri, Petra Jaya, Puncak Borneo, Sri Aman, Lubok Antu, Betong, Saratok, Julau, Kanowit, Selangau, Hulu Rajang, Sibuti, Baram, Limbang enggau Lawas.
Ungkup AMANAH iya nya di Santubong, Kota Samarahan,Batang Sadong, Batang Lupar, Igan enggau Tanjung Manis.
Ngenang kaul ke sama, Chong netapka DAP Sarawak deka ngena logo ‘Rocket’ ba RU14.
Ku iya pekara nya diputus ba aum PH kemari ke alai PKR enggau AMANAH Sarawak deka ngena logo PKR.
Iya nambah pemutus nya bepelasarka gaya politik di Sarawak ke bebida enggau di Semenanjung Malaysia.
Pemutus nya mega ku Chong deka nentuka pemujur PH Sarawak ba tetiap penuduk parlimen endur chalun ari gempung nya bisi bediri minta pilih.
“Tu mandangka PH Sarawak ti diarika PKR Sarawak, DAP Sarawak enggau AMANAH Sarawak ngembuan kuasa otonomi ba polisi enggau pekara ke bekaul enggau parti,” ku Chong.
Dulu agi ari tu Chairman PH Menua Tun Dr. Mahathir ba sebengkah pengerami di Johor madah gempung parti dalam PH deka ngena logo PKR ba PRU14.
Di Semenanjung Malaysia, kelimpah PKR, DAP enggau AMANAH, gempung PH mega disereta Parti Pribumi Bersatu Malaysia.
DAP Sarawak deka ngena logo ‘Rocket’, PKR enggau AMANAH Sarawak deka ngena logo PKR, pemutus nya bepelasarka gaya politik di Sarawak ke bebida enggau di Semenanjung Malaysia. Chong Chieng Jen Chairman PH Sarawak