PNS ngatur ‘Juh Nambah Ilmu 2018’ mungkur kandang menua pesisir

KUCHING: Pustaka Negeri Sarawak (PNS) sekali agi bisi ngaga program ‘Juh Nambah Ilmu 2018’ di sekeda palan macha ke mensia mayuh di mengeri enggau kandang menua pesisir, lalu entara palan macha ke bisi ngaga program nya, Kuching, Kota Samarahan, Lubok Antu, Betong, Sibu enggau Mukah.

Program bansa tu mujur matak urung 700 iku komuniti. Entara pengawa ke bisi diatur beserimbai enggau Program ’Juh Nambah Ilmu 2018’ iya nya program ‘Ilmu di Hujung Jari’ begulai enggau orang tuai, pampang ‘Bacaan Kegemaran Saya’, ‘ E- storytelling: Imagine a Butterfly’, ‘The Art of Craft’ , MakeyMakey begulai enggau anak mit, ngaga pengawa Makerspace baka ‘ 3D Printing, 3Doodler (Build your own name)’ begulai enggau bala nembiak sereta nembiak sekula sekondari.

Program tu betuju ngangkatka Palan Macha Sibu ( Pustaka Sibu) ke deka dibuka dalam taun 2019 kelimpah ari matih komuniti ngangkatka penemu nya sebagi ari adat pendiau komuniti.

Kelimpah ari nya, program tu mega digaga kena ngangkatka penemu ngadaka komuniti ke ngembuan penemu dalam pemadah ke nyadi kemaya hari tu, kelebih agi bekait enggau teknologi kediatu.

Sekeda palan macha ke mensia mayuh di mengeri sereta sitak kandang menua dipilih nyadi endur ngatur Program ‘Juh Nambah Ilmu 2018’, lalu entara nya, Palan Macha (Perpustakaan) ke mensia mayuh di Opis Kunsil Majlis Perbandaran Kota Samarahan, Kota Padawan, Engkilili, Lubok Antu, Kampung Tengah Pusa enggau di Pusa.

Di Sibu, program tu bisi digaga di Palan Macha ke mensia mayuh di pampang Lanang, Sibu ( Grand Heights), Desa Teku, Sukun enggau Durin. Palan Macha bukai ke sama bisi enggau ngulu program tu, iya nya di Palan Macha Desa Kampung Teh, Mukah, Dalat enggau Desa Oya.

Bepelasarka timbal ke manah diterima ari bala penyereta ari berenggat umur matak pengeransing ati Pustaka Negeri Sarawak ngaga baru program tu jemah ila. Urung 283 iku penyereta udah ngerijista sida iya empu nyadi kaban Pustaka.

Program ’Juh Nambah Ilmu’ ke pemungkal iya mujur digaga kena 24 ngagai 29 Julai 2017, enggau penyampau penyereta urung 731 iku mensia mayuh ke bisi ngulu program tu ti digaga di sekeda buah palan macha ke mensia mayuh enggau di kandang menua pesisir di Sri Aman, Betong enggau Sibu.

Mensia mayuh ke deka nemu pasal program tu enggau silik agi tau betanya ngagai Dayang Najwa Hazwani tauka Siti Zalilah Abang Zaidi di ba lumur talipaun 082-442000 samb 339/338 sereta emel najwa@ sarawak.gov.my / si tizz@ sarawak.gov.my.