Jalai alun ngagai menua Kapit dijamin tembu, enti BN menang
SIBU: Baruh pegai Chairman Barisan Nasional (BN) Menua Datuk Seri Mohd Najib Tun Razak, bagi menua Kapit deka disambung nengah jalai alun dalam kandang tiga taun agi.
Jamin tu dibantaika penyandang penuduk Parlimen Hulu Rajang Datuk Wilson Ugak Kumbong enggau ngumbai Najib nyadi siku ketuai lumur 1 menua ti chukup siruka peminta nengeri tu.
“Dibida jeman Tun Dr Mahathir Mohamad lebuh nyadi Menteri Besai, peminta kitai di Kapit enda dikeibuh.
“Tang Najib udah meri pengelantang enggau mendingka peminta kitai ngelama tu,” ku iya lebuh bejaku bejadika Hari Permuafakatan renggat keterubah enggau Aum Besai Serakup Apai Indai enggau Pengajar(PIBG) SMK Sibu Jaya ditu, kemari.
Sama bisi datai Chairman PIBG SMK Sibu Jaya, Danggang Ugik enggau Prinsipal SMK Sibu Jaya Mohd Yusri Azhar Abdullah.
Ku iya, di baruh pegai Najib, nengeri tu nerima bemacham projek insfrasturktur, pemansang enggau ke bukai kelebih agi projek Jalai Besai Pan Borneo.
“Tu ngayanka Najib enggau Kepala Menteri Datuk Patinggi Abang Johari Tun Abang Openg nengah perintah besai enggau nengeri seruran bekerejasama pulaika pemaik rayat,” ku iya madah nyemetak.
Ku iya, rayat sekali tu patut milih memanah maya Pengawa Bepilih Besai (PRU) ti deka datai.
“Nadai ketuai baka Najib ti chukup kiruhka Sarawak.
“Nya alai, kitai patut terus meri mandat ngagai Najib maya PRU tu nentuka BN ulih megai perintah baru Putrajaya lalu Sarawak deka terus bulih pemansang,” ku iya nambah.
Ba lansa bukai, iya ngelalau apai indai ke bisi datai ngemeratka pelajar bala anak sida.
“Nadai pelajar, kitai nyangka enda ulih nyingkang jauh laban semina pelajar aja ulih ngubah pengidup kitai,” ku iya.
Iya mega meransang apai indai bela sampal nurun ngundi maya hari bulan ti udah ditetap ila sereta ngaga pilih betul ungkup bala anak sida jemah.
“Pilih ketuai ti bepenau merintah sereta ngemai menua tu nyadi menua maju ti besemekih kelebih agi ba ekonomi dunya, digital sereta ke bukai ba pengawa ngangkat ekonomi peranak iya,” ku iya nampung silik.
Berebak enggau program sehari nya, Ugak mega bisi nyuaka chek pemeri iya ngagai PIBG SMK Sibu Jaya penyampau RM10,000 ungkup belanja sida.