Sarawak meseti sedia ngubah perintah: Baru
MIRI: Pengawa Bepilih Besai Ke-14 (PRU14) nyadi indu semua pengawa bepilih ngagai penyakal lalu enti puntan ngerampas Putrajaya, pangka ari pemutus kepenudi deka mangka bala anak enggau uchu kitai dudi hari.
Ketuai Parti Keadilan Rakyat (PKR) Nengeri, Baru Bian madah nya kebuah kitai ari Pakatan Harapan (PH) begempung maya bepilih tu lalu nyadi siti ngelaban Barisan Nasional (BN).
“Semenanjung Malaysia enggau Sabah enda tinggal di belakang ari ubah lalu nya kebuah kitai di Sarawak meseti sedia ngubah perintah,” ku Baru rambau Walkabout di Old Men Street, Miri kemari.
Sama bisi datai Sekretari Parti Tindakan Demokratik (DAP) Nengeri, Alan Ling Sie Kiong, Kaban Kunsil Nengeri (ADUN) Pujut Dr Ting Tiong Choon, Sekretari Pemadah DAP Johor, Wong Shu Qi enggau Ketuai Nembiak DAP Miri Peter Hii.
Nitih ku Baru, nya kebuah maya pengawa bepilih tu kitai begempung lalu gawa begulai antara DAP, PKR sereta Amanah nentuka PH ulih menang mayuh agi penuduk ditu, di Sarawak.
Ku iya, kerejasama enggau tim gawa antara PH meseti kering nentuka penyakal ulih menang sereta mantil mayuh agi penuduk di nengeri tu.
Ba lansa ke bukai, Baru ngansak pengundi di Sarawak enggau sida ke bekereja menua tasik bela datai ngayanka pemayuh tubuh laban sida bisi tanggungpengawa ngagai menua enggau bansa.
Ku iya, pemayuh tubuh ti datai enggau peratus tinggi pansut ngundi chukup manah ngagai menua tu laban rayat bejalaika hak sida enggau mantaika pinta sida nengah undi.
Ku iya, kitai minta rayat di Miri enggau bala pengundi ti nyukung penyakal ngambika sedia lalu datai muai undi sida.
“Rayat patut bejalaika pangku pengawa lalu sida ke diau di luar mengeri enggau menua tasik meseti pulai ke menua muai undi sida,” ku Baru madah nandu, nyemetak.
Dulu agi ari nya, ku iya, PH udah setuju agih penuduk di Sarawak nitihka agih pengawa bepilih besai ke suba.
Ngelansa pasal chalun di Miri, ku iya, bala ketuai tetinggi PH deka mantaika nama chalun enda lama agi.
Ngelansa pasal perambu Chairman DAP Sarawak, Wong, ke alai nama bukai deka bediri minta pilih ba penuduk Miri, ku iya, keretas kereja enggau perambu deka diperunding lalu enda kelalu laun laban kepenudi sida dekaka chalun ulih menang ari penyakal.
Ba iya empu diperambu deka dichalun ungkup Miri, ku iya, dalam prinsip, iya enggai meri jaku ngelakuka diri empu lalu neju ngagai raban bukai ngambika meri penemu lalu meri mayuh macham peragam.
Pekara pemadu beguna kitai dekaka chalun ulih menang baka ti disebut ke alai PRU14 beguna amat lalu kitai deka nyadi siti ngelaban BN, ku iya nambah.