PETRONAS, JBPM udah mujur ngemunka PBS Long Sukang
LONG SUKANG, LAWAS: PETRONAS, enggau kerejasama Opis Bomba enggau Penyah Penusah Malaysia ( JBPM) sereta komuniti ditu, ngelancharka Serakup Bomba Volunteer ( PBS) Long Sukang, kemari, nyadi sebagi ari inisiatif Pelaburan Sosial Korporat (CSI) kompeni nya.
Di baruh program tu mega, nyauka 40 iku peranak genturung pendiau nya udah nerima latih pemun pengawa bomba, nyengkaum latih bantu ngenyit enggau perengka ngerara api ari Opis Bomba enggau Penyah Penusah Lawas.
“Kereban ti disedia sereta penemu pekara bekaul bomba, deka ngasuh sida nyadi orang ti keterubah nagang penusah angus enggau mantu sida tasah ari pengawa meri bantu ngenyit seraya nganti penatai raban Bomba enggau Penyah Penusah ngagai endur penusah nyadi,” pia ku pengari PETRONAS rambau program nya.
Ku iya, program tu mega nyadi sebagi ari inisiatif PETRONAS dikena nentuka komuniti ke diau di sepanjai jalai projek sambung gis, Sabah Sarawak Gas Pipeline (SSGP), seruran sedia enggau pun pekara pengelikun dikena nyeliah enggau mutarka sebarang penusah ti nyadi tauka tau nyadi.
Kebuah pia ku iya, bisi beberapa genturung pendiau dikaul dalam projek tu, jauh ari pasar Lawas, penyauh bisi datai dua jam pejalai.
“Nya alai, ari pemisi raban Bomba Volunteer tu, deka nyadi raban rintai mua, ulih mantu ngurangka keruga penusah angus tauka penusah ngenyit nyadi,” ku iya nambah.
Berebak enggau nya, raban Bomba Volunteer udah nembuka dua modul latih pemadu baru lalu deka terus nampung latih ti patut, dipejalai bala pemesai Opis Bomba enggau Penyah Penusah nya empu.
Sama bisi datai Direktor Opis Bomba enggau Penyah Penusah Nengeri, Nor Hisham Mohammad enggau bala pengari PETRONAS sereta lebih 100 iku peranak ari genturung pendiau nya.