PAIS udah nganjung bantu ngagai peranak Long Peluan
MIRI: Serakup Iban Sarawak (PAIS) udahnganjung bantu ngagai sida tasah angus di Long Peluan, Ulu Baram.
Pemeri baka gari nyengkaum pua (sepenyampau 35 guni), minyak makai (dua kutak), gula (24 kg), ai mineral, berau enggau pemakai bukai, semua nya diangkut ngena tiga buah entukar 4WD diempu Sarawak Trucker Society.
Nitih ku presiden PAIS, Samuel Suring, kesemua bantu nya asil dipupu enggau pemeri ari bala kaban PAIS di nengeri tu.
“Ari tu dikena nyuaka bantu ngagai raban serakup, Sarawak Trucker Society, sebengkah gerempung ukai dikuasa perintah ke mega bakih kami, ngemai semua pemeri tu ngagai Long Peluan lalu dianjung begulai enggau pemeri sida,” ku Samuel nerang.
Ku iya, bisi lapan buah entukar 4WD diempu Sarawak Trucker Society ti ngemai semua bantu ngagai Long Peluan, udah meleka ari endur nya.
Raban PAIS, mega dikelala enggau nama Dayak 360 (D360) sebedau tu, bantu udah disua Ketuai Pekara Pengelantang PAIS, Christopher Kelly ngagai pengari Sarawak Trucker Society.
“Taja bantu kami enda mayuh, tang asil tu ari penge- lurus enggau penyiru bala kaban APIS mantu sida ti begunaka bantu.
“Kami ngarapka bantu tu ulih ngelempungka tating semua sida ke tasah angus lalu aku besampi sereta ngarapka semua atur pejalai nganjung bantu bala bakih ari Sarawak Trucker Society muntang sereta likun datai ba menua dituju,” ku Samuel.
Urung pukul 11 malam, 5 April, 19 pintu bilik rumah panjai Long Peluan dituntung penusah angus ngujungka semua peranak dia semina tinggal gari ba punggung aja.