Pengeransing kaban gerempung deka nentuka penegap SDNU Sibu
SIBU: Pengering Gerempung Dayak Sarawak ( SDNU) Pampang Sibu bepanggai ba bala raban gerempung nya empu ngemujurka agi penumbuh sida ti mai pemaik ngagai bansa Dayak sitak tu.
Ketegal nya ku Sapit Presiden SDNU Datuk Alexander Nanta Linggi madah, nyema bisi pekara ti deka dirandau enggau pangan diri engkeman agi enda ibuh dibai ngagai piak bukai.
“Dalam gerempung tu kitai bisi atur kediri empu.
“Lalu atur tu nyadika lalau kitai nyema bisi pekara ti deka dirandau enggau pangan diri.
“Ba SDNU kitai bisi ketuai tauka indu opis, dia tau endur kitai betanya sebedau mai ngagai piak ke tinggi agi tauka piak bukai,” pia ku iya madah.
Iya mantaika jaku lalau tu maya datai ngulu Aum Besai Ninting Taun (AGM) SDNU Sibu ke diatur ba Kingwood Hotel, hari Minggu tu tadi.
Aum tu bela dikemata Sekretari Besai SDNU Dato Ir Alice Jawan enggau Tukang Wang Besai SDNU Christopher Gira Sambang.
Nanta ti mega Sapit Menteri Pemansang Menua Pesisir enggau Kandang Menua sekali agi madahka atur dalam gerempung enda patut dikelaung ngambika gerempung semampai tegap lalu mujur bejadika tuju ngagai bansa Dayak.
“Anang belampung ati nyukung gerempung lalu ke beguna anang ngembuan penemu deka ngelemika gerempung kitai.
“Enti nadai sukung, pemansang gerempung tu tau nyadi tasar,” ku iya madah baru.
Chairman SDNU Pampang Sibu 2018-2020 ti mega chairman ke sebedau tu, Chambai Lindong ba jaku iya maya tu meri besai terima kasih ngagai bala raban gerempung sida ti udah bela besaup ngemansangka gerempung ngelama tu.
“Kitai mega meransang bala raban ngambika enda sanggu ngulu nama-nama program ke deka diatur gerempung nangkan ke tu ila.
“Kebuah pia, gerempung tu ukai enggi aku siku tang enggi semua kitai,” pia ku iya iya sambil madah naka ke diatur SDNU Pampang Sibu udah bisi urung 4,000 iku raban.
Ngenang pemayuh bala raban ke datai ngulu AGM ti diatur beserimbai enggau pengawa milih komiti baru nya, Chambai pechaya penyampau nya mandangka tikas runding raban sida tampak ngemeratka pemesai reti tuju penumbuh gerempung ngagai bansa Dayak ba sitak Sibu.
Kelimpah ari nya, awak tu mega dikena iya mantaika pengingin ati sida bekaul enggau pengeransing deka ngembing raban ke biak agi dalam gerempung.
Iya madah, tu dikena sida nyikap rebak baru ti deka nyadi ketuai ngiring SDNU Sibu dudi hari ila.
Ba pekara bukai, iya mega madahka sida udah merambu macham bengkah program ungkup renggat 2018-2020.
Program nya ku iya endang lebih bepelasarka deka mai pemaik ngagai bansa Dayak ditu.
SDNU Sibu mega deka nyadi ketuai komiti pengatur Gawai Dayak Sibu 2018 ti diatur kena 26 Mei ti deka datai.
Pengerami nya ila disadang deka digulu Sapit Kepala Menteri Datuk Amar Douglas Uggah ba Dewan Suarah Sibu.