Bisi 44 pekara dikemeratka dalam manifesto PBDSB dikena nentuka atur pengawa perintah udah tu lurus sereta beresi

KUCHING: Parti Bansa Dayak Sarawak Baru ( PBDSB) deka seruran bejalaika pengawa ti pulaika pemaik rayat Sarawak sereta bansa Dayak maya Pengawa Bepilih Besai Ke14 (PRU14) tu.

Nya alai, sida datai enggau manifesto kediri empu ti ngerintai 44 perkara enggau ngemeratka pekara hak enggau pengelantang rayat nengeri tu.

Nitih ku sapit presiden iya, Patrick Anek Uren, batang tuju manifesto PBDSB iya nya nentuka atur pengawa perintah udah tu lurus sereta beresi.

“PBDSB iya nya sebuah parti mit. Nya kebuah kami enda ngayanka diri deka numbuhka perintah dalam timpuh semak.

“Pekara ti dikedeka kami iya nya sebarang raban ti numbuhka perintah ila meseti lurus agi sereta enda salah guna kuasa, kroni enggau makai suap,” ku iya.

Iya mansutka jaku nya rambau aum pengarang berita beserimbai enggau pengawa mantaika Manifesto PBDSB ditu, kemari, mega digulu presiden sida, Cobbold John.

Antara pekara dilis dalam Manifesto PBDSB nagih ngena jaku ‘Dayak’ nyadi Bansa Dayak dikena nyilih ‘lain-lain’ tauka Bumiputera ba pom di Malaysia.

Kelimpah ari nya, nagih pansik ba semua pekara enggau silik dalam Sempekat Malaysia 1963 ( MA63), nyengkaum mulaika baru status Sarawak ngagai baka ti bisi dalam sempekat MA63 nya.

Bela matak perati iya nya elawin nyaga anak sepenyampau RM1000 sebulan ungkup bala indai ti nadai kereja enggau ti bekereja enggau penatai pemisi baruh RM1,000 sebulan.

Tambah mega, parti nya nagih insentif RM1,000 ungkup anak mit baru ada enggau insentif belaki bebini baru RM2,000 ngagai sida ti baru jadi.

Manifesto PBDSB mega bisi nyediaka pelajar nadai bebayar ungkup pra-sekula, sekula primari enggau sekula sekondari nyengkaum universiti sereta elawin RM500 sebulan ungkup nembiak sekula primari enggau sekondari, seraya nembiak belajar di universiti disemaya RM1,000 sebulan.

PBDSB iya nya sebuah parti mit. Nya kebuah kami enda ngayanka diri deka numbuhka perintah dalam timpuh semak. Patrick Anek Uren Sapit Presiden PBDSB

NYADIKA PERANSANG: Kadim (kanan) nyuaka anugerah ngagai siku ari staf rambau Magu 2018 ti diatur di DeTar Putra, Unimas kemari.

MANIFESTO PBDSB : Cobbold (duduk, dua kiba) enggau Patrick (duduk, dua kanan) begulai enggau bala kaban PBDSB mantaika manifesto sida rambau aum pengarang berita ditu, kemari.