Hari muai undi ke PRU14 ditetapka kena Hari Tiga, 9 Mei 2018
KUCHING: Hari muai undi ke Pengawa Bepilih Besai ke-14 (PRU14) udah ditetapka kena hari Tiga, 9 Mei 2018.
Chairman Opis Pengawa Bepilih Malaysia Tan Sri Mohd Hashim Abdullah pengudah baum bekait enggau PRU di opis SPR di Putrajaya pagi kemari,ngaga pemadah nya netapka hari ngantung nama deka diatur kena 28 April 2018, lalu muai undi tumu deka digaga kena 5 Mei 2018.
Opis SPR netapka haribulan mansutka ‘ Writ’ ( 11 April 2018), Hari Ngantung Nama Chalun ( 28 April 2018), Hari Muai undi Tumu (5 Mei 2018), eng- gau Hari Muai Undi (9 Mei 2018).
Lalu timpuh bekimpin ke semua parti politik dikemendarka dalam kandang sebelas hari berengkah ari haribulan ngantung nama.
“Timpuh bekimpin ditetapka dalam kandang 11 hari berengkah ari haribulan ngantung nama chalun datai ngagai pukul 11.59 malam kena 8 April,” ku Mohd Hashim madah maya meri pemadah haribulan ke berat PRU14 ba aum pengarang berita khas ke ditaburka terus di RTM, di Indu Opis SPR di Putrajaya, kemari.
Minggu siti nyin tadi, kena 7 April 2018, Parlimen dipadamka, meri jalai ngagai PRU14.
Opis SPR Malaysia udah dipadah ulih Seri Paduka Baginda Yang Di-Pertuan Agong bekait enggau Parlimen Penggal ke-13 dipadamka kena 7 April 2018, lalu ditangkan enggau pemadah ulih Speaker Dewan Rakyat bekait enggau Parlimen ke13 dipadamka, sereta Speaker Kunsil Nengeri ke semua sitak menua sereta DUN ke semua sitak menua ( di Semenanjung Malaysia).
Ba PRU14 ke sekali tu, penyampau kerusi ke deka alai bediri manggai urung 222 ( parlimen) enggau 505 ( kunsil nengeri di Semenanjung Malaysia, lalu ari penyampau nya ila, barang parti politik ke mayuh menang deka megai menua tu, ke ngembuan urung 31.7 juta rayat Malaysia.
Ba PRU13 suba, Barisan Nasional menang ba 133 kerusi ari 222 ke dirintaika alai bediri.
Maya parlimen dipadamka minggu nyin tadi, penuduk kerusi kediatu, iya nya BN ( 132), Parti Tindakan Demokratik ( DAP - 36), Parti Keadilan Rakyat (PKR - 28), Parti Islam Se-Malaysia (PAS - 13), Parti Amanah Negara ( PAN - 7), Parti Warisan Sabah (PWS - 2), Parti Sosialis Malaysia (PSM - 1), Parti Pribumi Bersatu Malaysia (PPBM - 1) enggau chalun Bebas ( 2).