Pemilih ke udah direjista naka Suku Keempat 2017 manggai 14,940,624

PUTRAJAYA: Indu Opis Pengawa Bepilih (SPR)udah netapka hari muai undi ke Pengawa Bepilih Besai ke-14 (PRU14) deka digaga kena 9 Mei 2018, lalu undi tumu deka digaga kena 5 Mei 2018.

Chairman SPR Tan Sri Mohd Hashim Abdullah madah ba sentang pengawa bejalaika proses PRU14, SPR udah nuduh 222 Pegawai Pengurus Pilihan Raya, lalu ba pengawa matau semua pengawa kimpin pengawa bepilih sepemanjai timpuh ke udah ditetapka kena bekimpin, SPR mega bisi numbuhka 445 Raban Orang ke Bejalaika Kuasa (Pasukan Penguatkuasa Kempen Pilihanraya tauka PP-KPR).

Mohd Hashim madah ke pengawa bepilih besai parlimen ke sekali tu, urung 259,391 pengereja pengawa di Opis Perintah dipadu ngemutarka PRU14.

Lalu urung 8,989 buah palan rumah deka dikena nyadi Palan Muai Undi ke ngembuan ke semua 28,995 Palan Muai Undi (Saluran) lalu dipelabaka begunaka belanja urung RM500 juta.

Rejista Pemilih PRU14 ke deka dikena ke PRU14 datai ngagai Suku Keempat Taun 2017. Rejista Pemilih nya ngembuan 14,940,624 pemilih ke udah direjista, mungkur Pemilih Biasa (14,636,716 iku), Pemilih Tumu (Sedadu enggau Bini/Laki/Polis)(300,255 iku), Pengundi ke Nadai Datai Menua Luar (3,653).

Iya nandu baru madahka Rejista Pemilih Pengawa Bepilih deka berengkah dijual kena 16 April 2018. Pengundi mega ulih mansik Rejista Pemilih nya enti sida iya deka nemu pasal palan muai undi sereta endur (saluran)ngundi nengah Laman Web SPR www. spr. gov. my tauka nengah aplikasi MYSPR SEMAK tauka nalipaun ngagai lumur 03-88927018 tauka nengah SMS 15888 belabuh ari 16 April 2018.

SPR mega bisi madu 14 buah NGO sereta pengari ari uni- versiti menua tu nyaadi pemerati, bejalaika pengawa sida iya ngemata proses PRU14, berengkah ari Hari Ngantung Nama datai ngagai pemutus PRU14.

“Pemerati Entarabansa sereta Pemerati ari menua tu empu dikemendarka bejalaika pengawa sida iya ngemata ba dalam palan ngantung nama, palan ngundi tumu, palan ngundi, endur ngitung undi sereta proses penyampau undi di palan alai ngitung undi rasmi.

“Dalam pekara tu, SPR enda ngemendarka sebarang gerempung sereta orang bukai kelimpah ke udah dipadu ulih SPR matau sereta ngemata proses PRU14,” ku iya.

Iya nandu baru madahka Hari Bulan ke Penudi iya endar deka ngundi nengah Pos Dalam Menua tu ke kategori 1A deka ditutup kena 28 April 2018.

“Lalu haribulan ke penudi iya endar ke peminta Kategori 1C ditutup kena 23 April 2018,” ku iya.