Pemansang menua pesisir tetap dikemerat dalam manifesto BN

KUCHING: Perintah Barisan Nasional ( BN) sigi beratka mayuh agi pemansang deka digaga di menua pesisir.

Ketuai Pemadah Parti Rayat Sarawak ( PRS) Andy Lawrence madah pemansang menua pesisir deka deras sereta tegap agi digaga enggau mayuh pemansang baka ke di mengeri tauka di pasar, lalu nitihka pemansang dunya.

“Nya kebuah pemansang telekomunikasi dikemeran endar nitihka singkang dunya, laban Perintah BN deka ngerapitka tikas entara mengeri enggau menua pesisir.

“Program pemansang tu mega nyengkaum ngiga chara ngangkatka penatai pemisi rayat di menua pesisir.

“Manifesto sekali tu sigi amat silik sereta ulih dikemujurka. Dalam kandang 5 taun tu ila, rayat Sarawak deka meda ubah ti besai digaga ulih Perintah BN Sarawak,” ku Andy.

Iya madah munyi tu lebuh nimbal Manifesto Barisan Nasional Sarawak 2018 ti dipunka ulih Kepala Menteri Datuk Patinggi Abang Johari Tun Openg ba siti atur pengawa ngepunka manifesto nya ensanus.

ManifestoBNSarawak2018 bepelasarka ‘Ngemansangka Sarawak nengah Ekonomi Digital’ ngundan enam batang pekara ke mungkur 26 danji ke Pengawa Bepilih Besai ke-14 (PRU14).

Ba atur pengawa nya ensanus, manifesto nya seraris enggau manifesto BN Menua ti dipejadi ulih Menteri Besai Datuk seri Najib Tun Razak.

Abang Johari ti mega nyadi Presiden Parti Pesaka Bumiputera Bersatu (PBB) nandu baru madahka nengah manifesto nya BN Nengeri deka nyamin hak Sarawak meruan dijaga, taja pan ngelama tu udah majak lenyau, lalu patut dipulaika baru.

Enam batang pekara dalam Manifesto BN Sarawak, iya nya Perintah BN Sarawak deka majak nyaga hak rayat menua tu sereta ngetanka pemaik enggau penyerakup; Majak nyendiaka peluang belajar sekula enggau perengka rama ke manah agi; Terus nyungkak trasnformesyen menua pesisir; Majak ngangkatka pemanah kualiti pengidup rayat menua tu; Deka majak nyendia peluang baru dikena neruska pemansang enggau penyenang lalu ke penudi iya endar, deka majak ngemeranka atur pengawa Perintah ti manah enggau integriti, ku iya.