Pemansang dalam teknologi meransang ngelimat kuasa lalu udah muka mayuh bengkah bekal kuasa baru
KUCHING: Sarawak deka terus mansik pengawa ngemansangka bekal kuasa baru nengah pengawa mansik sereta nguna teknologi baru, pia ku Kepala Menteri Datuk Patinggi Abang Johari Tun Openg.
Iya madahka pemansang dalam teknologi, meransang ngelimat kuasa lalu udah muka mayuh bengkah bekal kuasa baru ti ngujungka sektor nya lebih kompetatif.
“Diatu nengah Opis Menteri Utiliti ti disukung Sarawak Energy (SEB), kitai masang sistem alternatif kediri, ngena teknologi mikro-hidro enggau solar dikena mantu nyendiaka bekal kuasa karan ngagai peranak di menua ulu nengah Skim Elekterik Menua Pesisir Sarawak (SARES).
“Pemansut Kuasa alternatif endang beguna amat ngagai juluk nengeri ti deka nyendiaka kuasa karan kelebih agi ngagai raban bansa di menua ulu ke enda ulih disambung nengah Grid Nengeri.
“Tu setipak enggau juluk deka nyapai 100 peratus semua disambung kuasa karan lebuh manggai 2025,” ku iya.
Abang Johari mansutka pekara nya lebuh bejaku seraya bejadika ‘4th International Sustainable Energy Summit (ISES) 2018’ ti diatur begulai Sustainable Energy Development Authority (SEDA) Malaysia enggau Opis Menteri Utiliti sereta kerejasama Opis Menteri Kuasa, Teknologi Gadung enggau Ai sereta Perintah Nengeri ba sebuah hotel ditu, kemari.
Iya madahka SARES udah mayuh ngubah pengidup rayat Sarawak ke sebedau tu nadai disambung kuasa karan. Berita pasal pemanah SARES ngerembai sereta diaku dunya, ti menang gelar ‘Alliance for Rural Electrification’ ba 4th ARE Energy Access Investment Summit di Catania, Sicily.
Nambahka nya, berindik ari kuasa hidro enggau solar udah dipejalaika, nengeri tu bisi juluk ngiga alternatif bukai ke ulih dikena baru sereta beresi, ku iya.
Sarawak Energy ( SEB) diatu ku iya, benung bejalaika pansik bekaul enggau minyak hidrogen ungkup nengeri tu lalu belanja udah disediaka dikena bejalaika pansik pasal ngeluarka hidrogen enggau ngena hidrogen ti nyengkaum numbuhka loji hidrogen.
Kelimpah ari nya dalam aum pengarang berita, Abang Johari bepenemu sistem pengerejista perengka pengangkut mensia mayuh di Malaysia patut diubah baru, awakka ulih ngena teknologi moden.
Iya ngarapka perintah besai ti bisi kuasa bekaul enggau perengka pengangkut mensia mayuh ulih beratika pekara nya.
“Malaysia patut ngemaru tauka ngubah rejista perengka pengangkut mensia mayuh. Enti Malaysia enda ngemaruka nuan enda ulih ngemeranka teknologi baru.
“Perintah besai patut beratika pekara tu. Enti enda, enda ulih ngena bas hidrogen, enti rejista nya nadai.
“Pekara bekaul enggau perengka pengangkut mensia mayuh ari baruh kuasa perintah besai. Enti ari baruh perintah nengeri, aku deka ngereja nya,” ku iya.
Sama bisi datai ba pengerami nya kemari Menteri Utiliti Datuk Dr Stephen Rundi Utom, Senator Datuk Seri Devamany S. Krishnasamy, Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Pelajar, Sains enggau Pansik Teknologi Dato Sri Michael Manyin Jawong, Menteri Wang Kedua Dato Sri Wong Soon Koh enggau ke bukai sereta lebih 700 iku pesereta.
Pemansut Kuasa alternatif endang beguna amat ngagai juluk nengeri ti deka nyendiaka kuasa karan kelebih agi ngagai raban bansa di menua ulu ke enda ulih disambung nengah Grid Nengeri. Datuk Patinggi Abang Johari Tun Openg Kepala Menteri Sarawak