Pekara pelajar endang patut dipasuk dalam manifesto BN
KUCHING: Manifesto Pengawa Bepilih Besai Ke-14 (PRU14) Barisan Nasional (BN) Sarawak ti nyerangkung beratka pasal pelajar sereta sekula nengeri tu, endang pekara ke amat patut.
Mandal Chancellor, University College of Technology Sarawak (UCTS) Prof. Datuk Dr. Khairuddin Ab. Hamid lebuh dikerandau Utusan Borneo madah, kelebih agi pekara pelajar Sarawak diatu betapi enggau pemar kelebih ba tikas penyulut akademik.
Ku iya, bepelasarka pemutus peresa perintah Sijil Tinggi Pesekolahan Malaysia (STPM) enggau Sijil Pelajaran Malaysia (SPM), taja pan bisi sekeda sekula teulihka penyulut ba renggat menua tang tebal agi agi kurang nyulut, reti nya tikas pelajar Sarawak agi kurang.
“Aku gaga amat laban pelajar dipasukka nyadi siti pekara dalam manifesto BN, laban pelajar tu pekara ti beguna amat ngagai pemansang timpuh panjai nengeri.
“Aku ngasaika pekara pelajar patut pemadu dikemeratka perintah awakka ulih nempa pengereja pengawa negeri ti bepenemu,” ku iya lebuh dipinta ngenang pasal Manifesto BN Sarawak 2018.
Manifesto BN Sarawak 2018 ti dibantaika Kepala Menteri Datuk Patinggi Abang Johari Tun Openg kena 9 April tu tadi, BN Sarawak besemaya deka terus nyendiaka peluang pelajar sekula enggai perengka rama ti manah agi.
Entara pekara bekaul enggau pelajar ti disemaya baka nambahka duit dikena melanja enggau bantu pelajar sekula; ngemanahka tikas enggau ngaga mayuh agi sekula baru; ngangkatka guna Jaku English nyadi jaku rasmi ti kedua; ngelakuka pelajar Sains, Teknologi, injiniring enggau Matematik (STEM) sereta Pelajar teknikal Vokasional enggau Latih (TVET) sereta terus ngaku nerima UEC lalu nulung sekula China, sekula misyen enggau sekula pengarap Islam.
Bejaku baru, Khairuddin madahka pekara pelajar renggat sekula patut dikemeratka kelebih agi di menua pesisir tauka menua ulu, ti ukai semina beratka kereban tauka perengkaguna sekula, ngemanahka sekula tang mega nyengkaum nyendiaka pengajar ti dilatih.
Iya bepenemu dikena ngangkatka penyulut kelebih agi di menua pesisir tauka menua ulu begunaka pengajar ti amat komited sereta dilatih.
“Laban enti nembiak enda diberi pelajar ti meruan, pe- luang sida nampung pelajar kurang sereta penyampau pengereja pengawa bepengelandik ke ditempa nengeri tu mega kurang.
“Lalu ari nya (pengurang pengereja pengawa bepengelandik) kitai bepanggai ba pengereja pengawa menua luar, aku ngasaika tu enda manah ke sarawak dalam timpuh ti panjai.
“Aku ngasaika pelajar tu enti ulih endang nyadi pekara ke pemadu dikemeratka enda ngira bagi parti, ke nyadi agenda ke pemadu beguna ngagai perintah,” ku Khairuddin.
Kelimpah ari nya, Dekan sekolah Kejuruteraan dan teknologi UCTS, Prof Ir. Dr Mohd Shahril Osman lebuh ditanya bekaul enggau manifesto nya mega sepenemu madahka manah laban ti mekuh ngagai pemansang perengkaguna mensia mayuh kelebih agi di menua pesisir, beratka pekara pelajar enggau ke bukai.
Manifesto BN Sarawak mega beratka raban biak TN50, lalu tu perambu ke chukup manah laban meri peluang ngagai orang biak baka nyendiaka peluang gawa, ekonomi kelimpah ari beratka pekara pelajar, ku iya.
“Diserangkumka semua, (manifesto) kelebih ngagai pemansang enggau peluang ekonomi sereta pelajar.
“Manifesto BN Sarawak endang manifesto ti chukup manah, tang lebuh udah bulih ‘mandat’, kitai ngarapka ulih dipejalaika, semaya enda tau enda dikeamatka,” ku Shahril.