Kapit deka disambung jalai ngagai serata Sarawak manggai ba taun 2021

KUCHING: Projek ngaga jalai ari Song ke Kanowit pemanjai 9.6 Km disadang tembu dalam timpuh tiga taun.

Sapit Kepala Menteri Tan Sri James Masing madah, projek nya ke nyadi ‘missing link’ ngagai Pelilih Kapit benung chakah digaga diatu.

“Aku nyadang dalam timpuh tiga taun ti deka datai iya nya manggai ba taun 2021, Kapit deka disambung ngagai serata Sarawak.

‘ Kelimpah ari nya, jalai Song ke Kapit disadang tembu sebedau hari gawai taun tu,”ku iya.

Masing mansutka penerang nya ngagai pemberita pengudah nyuaka chek MRP ngagai 20 penerima di Ringkat 5, Begunan Baitul Makmur di Kuching, kemari.

Masing ke mega Menteri Pemansang Perengkaguna enggau Perengka Pengangkut nambah semua jalai Kanowit- Song- Kapit deka dibelakin.

“Kitai ulih deriba mai entukar ari Kuching terus ke Kapit jemah, iya nya ba taun 2021,’tandu iya.

Ngenang sentang pengawa sehari nya, Masing nesau penerima MRP nguna bantu belanja nya ba pengawa ke diperambu deka digaga.

Ku iya, kena duit bantu nya nitihka perambu ungkup pemaik gerempung sereta nengeri.

Nitihka penerang Masing, bantu MRP ari opis menteri iya nya keterubah disua un- gkup taun 2018.

Penyampau RM855,000 diagih ngagai gerempung nyengkaum ke ukai dikuasa perintah (NGO) ba renggat keterubah taun tu.

Ari penyampau nya ku Masing, RM443,000 diagih ngagai gerempung di Kapit ke udah disua dulu agi ari tu lalu RM325 000 disua kemari ungkup 20 penerima di Kuching.

Bela datai Menteri Muda Nembiak enggau Lumba datuk Snowdan Lawan.