Laban perintah ngembuan perambu ke engkeman dikena nentuka juluk nya ulih dijapai lebuh datai ba maya nya ila
KUCHING: Perintah nengeri komited ulih tejapaika 100 peratus bekal kuasa karan 24 jam nyengkaum menua pesisir lebuh manggai ba taun2025.
Menteri Utiliti Datuk Dr Stephen Rundi Utom madahka nya berindik ari perintah bisi perambu engkeman dikena nentuka juluk nya ulih dijapai maya nya.
Ku iya, kelimpah ari ngembuan mayuh sungai ke besai sereta nerima pemayuh ujan ke manah ulih mantu ngasilka kuasa tau dikena baru, Sarawak mega ngemeranka teknologi enggau nempa kerejasama enggau piak ti bekaul.
“Nengah pemisi teknologi sereta kerejasama ari beberapa opis ti bekaul, kitai komited tejapaika 100 peratus bungkur kuasa karan di Sarawak lebuh manggai ba taun 2025.
Nengah pemisi teknologi sereta kerejasama ari beberapa opis ti bekaul, kitai komited tejapaika 100 peratus bungkur kuasa karan di Sarawak lebuh manggai ba taun 2025. Datuk Dr Stephen Rundi Utom Menteri Utiliti
“Tambah mega kitai bisi Tekad Ai baka Batang Ai, Bakun, Murum enggau ke deka datai Baleh sereta beberapa agi ke diperambu ti nyadika Sarawak ngasil sereta nyual kuasa karan,” ku iya.
Dr Rundi mansutka pekara nya lebuh bejadika pengawa nutup ‘ 4th International Sustainable Energy Summit’ (ISES) 2018, ke diatur ba sebuah hotel ditu, kemari.
Nambahka nya, iya madahka perintah nengeri bejalaika Skim Bekal Kuasa Karan Alternatif Menua Pesisir (SARES) dikena nyambung kuasa karan ke menua pesisir sereta menua ulu di nengeri tu.
Sebedau tu, iya kala madahka diatu urung 90 peratus kandang menua pesisir ba Sarawak udah kena bungkur kuasa karan 24 jam.
Dr Rundi lebuh ke ngenang pasal ISES nya, madahka opis menteri iya temegah ati laban Sarawak dipilih nyadi tuai rumah ti keterubah ari luar Kuala Lumpur.
“Aku ngarapka aum tu meri kitai penemu, ulih bekunsi penemu enggau peneleba bekaul enggau pekara tu.
“Lalu aku ngarapka Sarawak ulih belajar ari aum tu sereta ulih jampat maju ba pekara tu” ku iya ti gaga ati aum dua hari nya dipasuk urung 900 iku pesereta ari menua tu enggau menua tasik.
Kelimpah ari nya, Chairman Lembaga Pembangunan Tenaga Lestari (SEDA) Malaysia Datuk Dr Yee Moh Chai lebuh bejaku beterima kasih ngagai semua pesereta ti ngemujurka ISES 2018.
Iya madahka penyereta ari semua piak nunjukka komitmen sereta pengibuh ngagai pasal kuasa karan.
“Kitai di Malaysia bejalaika tanggungpengawa ngurus enggau ngemansangka tenaga lestari lalu tu (ISES) siti chara nuju ngagai juluk ke sama, “ku iya.
Sama bisi datai Menteri Muda Elekterik Menua Pesisir Dr Abdul Rahman Junaidi enggau Menteri Muda Bekal Ai Datuk Liwan Lagang enggau ke bukai.