BN dipelaba menang mudah ba sitak Mas Gading: Minos
KUCHING: Penumbuh sektor kuasa tau dikena baru deka nyungkak penumbuh ekonomi Sarawak dalam timpuh ke panjai.
Kepala Menteri Datuk Patinggi Abang Johari Tun Openg, madahka nya laban ekonomi ti bisi mayuh kuasa ke tan lama, iya nya ekonomi ti bisi pengulih ke pemadu manah ungkup pemansang ke tegap dalam timpuh panjai.
“Sarawak apin lama udah bejadika Strategi Digital Sarawak 2018 - 2022 dikena ngelancharka ekonomi iya ngagai Ekonomi Digital lalu Sarawak jemah ila deka nyadi sebuah menua ti manah laban rayat Sarawak ti ngarapka ulih ngerengkun Transformasyen Ekonomi Digital tu.
“Sarawak begunaka kuasa (tenaga) dikena ngemujurka Ekonomi Digital lalunadai ti manah kelimpah ari kuasa tau dikena baru,” ku iya.
Iya madahka pekara nya dalam teks jaku iya ke dibacha Sapit iya Datuk Amar Douglas Uggah Embas beserimbai enggau Pengerami Makai Lemai Aum Besai ‘Tenaga Lestari Antarabangsa’ (ISES) 2018 ti digulu Menteri Utiliti Dato Sri Dr Stephen Rundi Utom ditu, ensanus.
Berebak enggau nya, Sarawak ke dipilih nyadi tuai rumah endur ngatur ISES 2018 endang senipak amat enggau juluk nuju transformasyen ekonomi digital.
“Bekunsi penemu entara kita semua dalam pengawa dua hari tu ukai semina meri penguntung ngagai kita tang meri bantu besai ngagai nengeri ungkup pengawa sekumbang ngemujurka kuasa digital,” ku iya.
Iya beterima kasih ngagai pengatur ISES laban milih Sarawak nyadi nengeri keterubah endur ngatur di luar Lembah Klang.
ISES 2018, diatur Opis Bekuasa Ngemansang Kuasa Ke Tan Lama (SEDA) Malaysia ari baruh Opis Menteri Kuasa, Teknologi Gadung enggau Ai (KeTTHA) nengah kerejasama Opis Menteri Utiliti Sarawak.
“Kita semua ditu ketegal misyen ke amat beguna, ti deka mantu nuju pemujur Aum Besai ‘Tenaga Lestari Antarabangsa’ (ISES) 2018 ti diatur keterubah endar di luar Lembah Klang.
“Nya alai, Perintah Sarawak deka meri terima kasih ngagai KeTTHA enggau SEDA laban mai Aum Besai tu ke Sarawak lalu tu basa nyadi tuai rumah pengerami antarabansa ti beprestij,” ku iya. KUCHING: Barisan Nasional (BN) dipelaba menang mudah ba sitak Parlimen Mas Gading ba Pengawa Bepilih Besai Ke14 (PRU14) kena 9 Mei ila.
Penganalisis politik, Dato Peter Minos madahka ba PRU13, BN menang ba sitak nya nengah Anthony Nogeh Gumbek (diatu Dato).
Taja pan betapi enggau mayuh pemar kelimpah bediri minta ti keterubah endar, tang Nogeh ti bediri minta pilih ngena tiket Parti Demokratik Progresif Sarawak (SPDP) diatu PDP (Parti Demokratik Progresif) tetap menang.
“Ke sekali tu, Nogeh (enti bediri minta pilih baru) deka menang enggau mudah laban iya udah bisi peneleba ba politik sereta udah ngaga pekara ti positif ba Mas Gading.
“Iya ke nyadi sapit menteri dalam kabinet perintah besai, Nogeh udah nguji enggau pengabis manah deka mai pemansang ngagai rayat Mas Gading enda ngira bansa.
“Projek nanam nenas enggau rian musang king entara projek ti mujur diberi Nogeh kelala ba Mas Gading sereta ulih ngemansutka penatai pemisi sereta peluang gawa ba menua tu, “ku Peter ti ditelefon Utusan Borneo, kemari.
Ku Peter baru, lebuh Nogeh gawa ba SALCRA suba, iya mayuh mantu ngelaku sereta bejalaika kilang enggau ladang sawit ba raban bansa Bidayuh di Bau enggau Lundu.
Tu meri siti imej proaktif ngagai Nogeh enggau pengundi ba Mas Gading ke deka ngingatka iya sereta terus ngundi iya.
Penyakal ba Mas Gading, sekalika DAP tauka ngatika diri, nama pekara ti dikereja sida ba Mas Gading? Nadai kelimpah ari nganu BN.
“Pengundi ba Mas Gading kelebih agi bansa Bidayuh enda ulih dikemelika penyakal.
“Balat agi, DAP parti Semenanjung dijaga sida di Semenanjung ti enda nemu pasal nengeri tu enggau rayat iya. Kita enda patut ngundi penyakal, “ku Peter madah nyemetak.
Nengah bantu dua Kaban Kunsil Nengeri ( ADUN) BN ba Mas Gading, iya nya Dato Ranum Mina (ADUN Opar) enggau Dato Henry Harry Jinep (ADUN Tasik Biru), nya deka ngeringka agi Nogeh nyadi chalun BN ba sitak tu.
Peter mega melabaka Nogeh deka bulih pemutus ti manah agi dalam PRU14 dibanding enggau PRU13.
Sitak Mas Gading dipelaba bertanding tiga penyuru entara chalun BN (Nogeh) enggau chalun DAP (Mordi Bimol) enggau chalun Parti Bansa Dayak Sarawak (PBDS) Baru, Patrick Anek Uren.
Ba PRU13, Nogeh menang enggau 8,265 undi ngalahka tiga chalun bukai iya nya Patrick Anek Uren ari Parti Reformasi Negeri Sarawak (STAR), Mordi Bimol (DAP) enggau chalun ngatika diri Datuk Dr Tiki Lafe.