HAWANA minta perintah meri kelala ngagai profesionlisme pengawa pengarang berita
KUALA LUMPUR: ‘Hari Wartawan Nasional’ tauka Hari Pengarang Berita Nasional( HAWANA 2017/2018), keterubah endar diatur ke lalu nyadi pengerami hari pengarang berita ke pemadu besai, deka diatur sehari tu di Palan Pengawa Pemandang enggau Konvensyen Perbadanan Pembangunan Perdagangan Luar Malaysia ( MATRADE), di Jalai Sultan Haji Ahmad Shah ditu.
Atur pengawa nya deka berengkah ari 10:30 pagi datai ngagai pukul 6:30 lemai lalu deka dipejadi ulih Menteri Besai Datuk Seri Mohd Najib Tun Razak.
Atur pengawa nya ke digaga ulih BERNAMA enggau kerejasama raban media bukai di Malaysia ngembuan pemerat ngambika dikelala ulih menua Malaysia sereta muji pengawa ke digaga ulih pengarang berita mantu ngemansangka menua sereta ngenegapka penyerakup komuniti.
HAWANA nerima sukung ke tegut ari Menteri Komunikasi enggau Multimedia Malaysia, Datuk Seri Salleh Said Keruak pengudah iya enggau ngulu nyambut Hari Pers Nasional Indonesia di Ambon kena 9 Februari 2017 enggau di Padang kena 9 Februari 2018.
Ijinis Berita Nasional Malaysia, BERNAMA enggau kerejasama pengarang berita Malaysia bukai ngambi tanggungpengawa tu ngatur sereta ngaga HAWANA 2017/2018, ngangkatka profesionlisma pengawa pengarang berita menua tu.
Atur pengawa nya sehari tu deka digulu lebih seribu iku pengarang berita ari serata menua Malaysia sereta sekeda menua ASEAN.
Sekeda menua luar baka China, enggau Indonesia udah nyambut Hari Pengarang Berita lalu Perintah menua nya diatu meri kelala sereta betatika pengawa pengarang berita tetiap taun.
Malaysia nyadi menua ke nangkan kededua buah menua nya (China enggau Indonesia) ngatur program besai bansa tu, lalu pengatur pengawa tu ngarapka Hari Pengarang Berita deka disambut tetiap taun berengkah ari diatu.