Pekit Dayung, Kumang, Keligit, Keling, Belawan Gawai Miri deka diatur 19 Mei tu
MIRI: Indu dara enggau sida ke bujang bansa Dayak ditesau nyereta Pekit Dayung/Kumang/Keligit enggau Keling/Belawan Gawai 2018 ti deka diatur nyadi batang pengerami ngintu Pengerami Gawai Dayak Bagi Menua Miri 2018, kena 19 Mei tu ila.
Pekit bisi empat kategori iya nya Dayung Sangon, Kumang Iban, Keligit Orang Ulu sereta semina siti aja kategori lelaki iya nya Keling/Belawan.
Pekit ba kategori Dayung/Kumang/Keligit Gawai Dayak 2018, nerima sida ti beumur antara 18 taun ngagai 25 taun seraya Keling/ Belawan Gawai Dayak 2018 nerima sida ke bujang beumur 18 taun ngagai 30 taun datai ba hari bulan 19 Mei tu.
Pengari pengatur madahka sida ti udah belaki bebini, sarak sereta indai tauka apai tunggal, enda diterima bepekit.
Kelimpah ari nya, raban bansa Dayak megai pengarap Islam ti bisi ati ngambi bagi patut bisi surat pemendar/ penerang ari Jabatan Agama Islam (JAIS) bagi menua disempulang pemendar ari apai indai sida empu.
Pekit mega semina dikemendar ungkup nembiak belajar di kolej enggau universiti peribit, sida ti lepas sekula enggau nembiak ukai dalam institusyen pelajar di baruh pegai tauka bidang kuasa Kaunsil Peresa Malaysia.
Semua pesereta ti ngarika etnik sida empu patut nguasa jaku asal etnik sida tauka ti diarika sida lalu semua pesereta patut ngembuan peninggi abis nadai 150cm tauka 5 kaki tinggi, enda beselap/bekasut.
Ngagai pesereta penakan bansa Dayak ti ngena pun nama ukai Dayak (baka nama China, India tauka Eurasian), penyereta sida patut disempulang salin surat pengada enti dipinta kenuku ari raban pengatur.
Pom penyereta udah tembu diisi patut disempulang bayar sepenyampau RM25, salin tingki enggau surat pengada sereta dua limpir gambar pemesai passport lalu meseti ditikal pulai ngagai komiti pengatur pekit di opis Serakup Dayak Miri (DAM), di Lot 1088-1089, Tingkat 3, Floor, Rumah Persatuan Dayak Miri, Jalan Merpati, sebedau tauka abis laun kena 4 Mei 2018, urung pukul 4.30 lemai.
Bala pesereta ti dituku penyereta sida ila, deka nyereta renggat semi-final ti diatur kena 12 Mei 2018 (Hari Enam) bepalan di Bintang Megamall, berengkah ari pukul 6 lemai enggau ngerasuk pekayan ‘kebaya nyonya’ (ukai kebaya moden) ungkup indu enggau baju batik lengan panjai sereta tanchut panjai ungkup sida ke lelaki.
Semina enam iku pesereta kepenudi ari semua empat kategori deka dipilih tanam ngagai renggat kepenudi pekit Dayung Sangon, Kumang Iban, Keligit Orang Ulu enggau Keling/Belawan Gawai 2018 ti deka diatur di Hotel Meritz kena 19 Mei.
Ba kategori Dayung/Kumang/ Keligit perais lumur satu iya nya mata duit RM1,200 disempulang trofi, segempung bungai, hamper enggau setipikit.
Seraya penuduk kedua enggau ketiga bela nerima perais mata duit RM900 enggau RM700 disempulang trofi, segempung bunga, hamper enggau setipikit.
Tiga pemenang sagu ati ari tetiap kategori mega deka nerima perais mata duit RM400, hamper enggau setipikit.
Ba kategori Keling Iban enggau Belawan Orang Ulu mega deka nerima perais mata duit RM1,000 disempulang trofi hamper enggau setipikit.
Seraya penuduk kedua iya nya mata duit RM800 enggau ketiga nerima RM700, disempulang trofi, hamper enggau setipikit.
Tiga pemenang sagu ati ari tetiap kategori mega deka nerima perais mata duit RM400, hamper enggau setipikit.
Penerang silik, sida ke bisi ati tau telefon sekalika nuju Venezia Doning (0168611629) tauka Nancy Roba Ribid (016-8005889) ba kategori Dayung Sangon, Kitty Janggot 085-435467 (Opis Rumah Dayak), Angela Bugak (013-8471889) tauka Betty Pan (010-9831231) ungkup kategori Kumang/ Keling Iban enggau Loretta Herbert Madang (019-8360333) sereta Petrus Lasong (010-7728084) ungkup kategori Keligit/Belawan Orang Ulu. SIBU: Gerempung Dayak Sarawak (SDNU) Pampang Sibu agi ngandalka Chambai Lindong nyadi chairman sida bagi renggat 2018-2020.
Pengawa milih komiti tu diatur maya Aum Besai Ninting Taun SDNU Sibu ba Kingwood Hotel ditu, hari Minggu tu tadi.
Mandal chairman gerempung tu iya nya Johnady Janton lalu Samuel Sila nyadi Sekretari sereta dibantu Sammy Dennis nyadi Pemantu Sekretari.
Sayong Ambor dichiri nyadi Tukang Wang enggau Anthanasius Jala nyadi pemantu iya.
Komiti gerempung ke bukai iya nya Edwin Burong, Jawi Anom, Edwin Maring, Raymond Menjang enggau Anyi Angking.
Pengawa AGM tu dikemataka Sapit Presiden SDNU ti mega Sapit Menteri Pemansang Menua Pesisir enggau Kandang Menua Datuk Alexander Nanta Linggi, Sekretari Besai SDNU Dato Ir Alice Jawan enggau Tukang Wang Besai SDNU Christopher Gira Sambang.
SDNU Sibu serak tu benung chakah meri awak ngagai raban ke biak agi dikena meri sida peneleba laban sida dikeandal megai gerempung nya dudi hari ila.
Tebal agi bala raban exco SDNU Sibu ke diatu berumur 30 ngagai 40 lebih taun.