Raban Profesional dalam bidang Berubat diperansang nyadi volunter
KOTA SAMARAHAN: Pakar Sakit Orang Indu ba Sepital Besai Sarawak (HUS) ti mega nyadi pengelicha dalam pekara berubat di Universiti Malaysia Sarawak (UNIMAS), Dr. Mardiana Kipli, ngasaika pengawa bejalai ngagai menua Bangladesh ketegal pengawa pengasih ke rayat Rohingya (ke endang asal ari Bangladesh).
Dr. Mardiana angkat ari Sarawak lalu nuju ngagai menua Bangladesh alai iya enggau sekeda lutur sereta pakar bukai bejalaika pemerat pengawa pengasih sida iya ngubat rayat Rohingya ke sakit di di Cox’s Bazaar, Bangladesh.
Dr. Mardiana enggau sekeda lutur bukai sereta pegawai berubat ari Opis Menteri Pengerai Malaysia, dalam timpuh 2 minggu bejalaika pengawa pengasih nya, gawa baruh sebuah NGO, IMARET (IMAM Response and Relief Team)dianjung ngagai Kem Ketupalong dalam kandang dua minggu nya.
Operasi nya disukung ulih Malaysian Field Hospital (baruh pegai Angkatan Tentera Malaysia), Opis Menteri Luar enggau Opis Kunsil Pengelikun Nasional enggau NGO.
Dalam kandang dua minggu nya, tiap hari Dr. Mardiana udah berengkah gawa ari pukul 7 pagi, laban kem nya dalam dua jam penyauh ari pasar Cox’s Bazaar, alai sida ke ngatika diri (volunteers) diau.
Iya madah nyauka setengah juta rayat di menua nya diau ba gaya perengka guna ke digaga ari buluh sereta plestik sereta gaya infrastruktur ke balat endar jai.
“Sitak menua ke alai aku gawa nya sigi nadai jalai manah, tang semina tanah tauka pasir sereta bebukit. Tentu pejalai sida tu enti deka nurun beperesa ngagai klinik sigi pedis endar. Ku aku, rayat menua tu sigi beguna endar ke servis pengerai ke menyana,” ku iya.
Nyau pengelama dalam minggu kedua, tanggungpengawa Dr. Mardiana majak nambah ari 200 ngagai 500 kes sehari, ke datai mai mayuh macham penanggul penyakit baka pedis deka ensemputm chirit, asma, pedis pending tauka mata, jaundice, ‘diptheria’ sereta bakal tauka bekau bakal ke enda nemu suman.
“Pengelandik aku pakar penyakit orang indu, aku mega ngubat sereta nyaga bala indu ke betubuh bisi tauka baru udah beranak.
“Ketegal gaya topografi menua nya, kekadang orang indu ke deka beranak nyau nadai jalai bukai tang beranak ba kem nya empu, ngujungka mayuh ari sida tu napi penyakit enggau anak sida iya kena tinggang penyakit ‘sep- sis’,” ku iya lalu nandu baru madahka NGO enggau naka ulih ngaga mayuh agi bilik endur beranak ba kem nya.
Malaysia sebuah ari menua ke nimbal ngagai ‘misi kemanusiaan’ di Cox’s Bazaar ke mantu orang Rohingya ke rari ari Myanmar ketegal penyarut di menua nya.