‘Easter Joy Concert’ udah nerima sambut ti manah
MIRI: Karnival Easter dua hari berunggu udah diatur ujung minggu nyin tadi di Pustaka Negeri Sarawak, Miri ari St Joseph Cathedral ditu ke ditutup enggau ‘Joy Concert’ti udah digulu lebih ari seratus iku temuai.
Konsert dipunka enggau pemerindang koir Jaku Malaysia (BM) ari St Joseph’s Cathedral. Lagu pemuka sida iya nya ‘Cahaya Kristus’, ‘Alleluia Canon 3’, ‘Suci, Suci, Suci’ enggau ‘ Locus Este – Sanctus’.
Tu ditangkanka pemerindang ari katedral koir Jaku China enggau Koir English. Ditutup enggau pemerindang begulai ari semua pesereta koir, belagu Halleujah Chorus ari G.F Handel 1685-1759.
Dalam jaku ngelalu iya, temuai dipebasa maya konsert nya, Father Kevin Chundi meri jaku puji ngagai bala komiti pengatur ketegal pengiruh sida ti udah ngemujurka karnival nya begulai.
Iya mega meri terima kasih ngagai Pustaka Negeri Sarawak, Miri ti udah nyadi pengatur begulai pengerami nya, nyediaka palan endur ngatur Karnival Easter kena 7 enggau 8 April.
Berebak enggau nya, batang tuju karnival nya dikena mai pengelantang ati sereta ngerami Easter ngagai bala komuniti Miri ari semua serak pengidup.
Antara program rambau atur karnival nya iya nya Pengawa Mandangka Idup ti ngangkatka rega sereta angkunka pengidup. Bisi mega licha pasal Pengidup sereta mega sukut Berami Easter, aktiviti bukai baka ‘Guess the Egg Weight’, Word Search enggau main ke bukai.
Sama bisi diatur ‘Easter Flea Market’ ngaul pemakai menua tu enggau krafjari. Asil ari pengawa bejual deka nyadika belanja ngaga begunan Wisma St Joseph ti diperambu.