SPR udah netapka 9 Mei iya nya kena Hari Tiga nyadi hari muai undi ungkup PRU Ke-14
KUCHING: Hari ngundi ke kena 9 Mei maya hari gawa, iya nya hari ti manah manah sebaka enggau sebarang hari bukai dalam bulan nya.
Sapit Kepala Menteri Tan Sri Dr James Masing, madahka tu ukai pengawa ti nyelai endur ngatur hari ngundi kena hari gawa laban pengawa tu kala digaga lebuh penyanding penemu Pakatan Harapan (PH) nyadi menteri besai menua Malaysia.
“Ngundi maya hari gawa ukai pekara ti baru. Tun Mahathir lebuh 22 taun iya nyadi Menteri Besai Malaysia, kala ngatur pengawa bepilih besai tiga kali maya hari gawa,” ku iya lebuh nimbal jaku pejah ti nyakal Komiti Pengawa Bepilih Besai (SPR) netapka 9 Mei ungkup ngatur pengawa bepilih besai.
SPR mega udah netapka 5 Mei Hari Enam, ungkup ngundi tumu lalu 28 April ungkup Hari Ngantung nama.
Masing, presiden Parti Rakyat Sarawak (PRS) madah, pekara ke pemadu beguna iya nya bala pengaji ngemendarka bala pekereja ngelimpangka diri muai undi.
Opis Menteri Pengatur Pengereja Pengawa kena Hari Dua, 10 April, udah ngeluarka jaku tangkan minta pengaji peribit ngemendarka pekereja sida ngambi “time off” limpang bejalaika hak sida kena 9 Mei lalu nagang sida ari ngambi kemisi, deka ditinggang ukum manggai RM5000 tauka jil nyentuk ke setaun ari baruh undangundang pengawa bepilih. .
Sekula digerah tutup kena 9 Mei dikena ngemuntangka pengawa bepilih besai ti deka meda 222 penuduk sitak parlimen enggau 505 penuduk nengeri diperebut.
Kelimpah Sarawak, nengeri bukai di Malaysia ke deka ngatur pengawa bepilih nengeri sida sereta sekali.
Gempung merintah Barisan Nasional deka napi gempung Pakatan Harapan ti udah netapka diri ngena lambang Parti Keadilan Rakyat (PKR) nyadi lambang besai sida ke sekali tu.
Ngundi maya hari gawa ukai pekara ti baru. Tun Mahathir lebuh 22 taun iya nyadi Menteri Besai Malaysia, kala ngatur pengawa bepilih besai tiga kali maya hari gawa. Tan Sri Dr James Masing Sapit Kepala Menteri Sarawa