Mensia mayuh diperansang masuk pekit D’Dayak Battle of the Band 2018
KOTA SAMARAHAN: Pekit D’Dayak Battle of the Band 2018 (D’Dayak BotB2018) deka diatur dalam timpuh 15 April nyentuk 5 Mei 2018.
Diatur nyerumba genap ke-8 taun D’Dayak Cafe ditumbuh, pekit tau dipasuk semua raban bansa.
Nitihka penerang ari Ketuai Pengatur D’Dayak BotB2018, Teelong T, pekit nyadika pelasar dikena raban sida ke rindu ba pengawa musik ngerembai sereta mantaika pengelandik sida.
“Pekit tu tebuka ngagai semua raban, nadai tatak ba umur sereta patut bedau kala ngerikod tauka ngeluarka album.
“Lapan bengkah raban ke pemadu manah deka dipilih ngagai renggat final ke deka diatur kena 5 Mei, nyerumba pengerami Mantar Gawai,” ku Teelong.
Iya netapka semua renggat bepekit tu deka diatur ba D’Dayak Café, Kota Samarahan ke alai renggat nisih deka diatur kena 15 April (Hari Minggu) pukul 6 lemai lalu renggat semifinal kena 29 April (Hari Minggu).
Pom sereta atur bepekit tau berengkah diambi ba D’Dayak Café, ba Dayak Kitchen & Grill (Tabuan), bansal bejual Layar Daun (Rumah Asap Dayak Samarahan), Langkau Asap Batu Kawa enggau MK Smoke House Bbq & Café.
Pom ke udah tembu diisi patut dianjung ngagai komiti pengatur ambis laun kena 14 April, pukul 8 malam.
Champion pekit deka nerima perais mata duit RM1, 000, lumur dua nerima RM750 sereta ke- 3 nerima RM500. Semua band ke masuk enggau bepekit deka nerima setipikit.
D’Dayak Café nyendiaka mayuh bengkah pemakai asal, panggang jani enggau pemakai bukai, dibuka ninting hari berengkah ari pukul 6 pagi.
Palan tu mega suah muka pengerami panggau pemerindang begulai enggau raban penanyi menua tu dikena merindang mensia mayuh ke datai berami.
Penerang silik senentang D’Dayak BotB2018, tau dipeda ba facebook. com/ddayak battle of the band 2018, tauka telefon (WhatsApp) nuju lumur 011 33025017 / 019 8789930.
k