Pekit Safari Rakit Baleh-Kapit deka majak diatur,ku Joseph Belayong
KAPIT: Pekit berakit deka seruran diatur berindik ari sukung ke manah ari peranak menua nya, pia ku Residen Bagi Menua Kapit, Joseph Belayong ke lalu nyadi chairman pengatur Safari Rakit Baleh-Kapit 2018, 7 ngagai 8 April tu tadi.
“Bida enggau taun nyin tadi, kami taun tu nerima mayuh agi tim iya nya bisi 36 iti.
Sekeda ari SEB Kuching, Sibu, Belaga enggau menua tu empu. Dua renggat lumba urung empat jam pengelama, ti diatur dua hari berunggu, Hari Enam enggau Hari Minggu.
“Hari keterubah, 7 April, meleka ari Rumah Naga napatka Rumah Benggau, urung dua jam pengelama, lalu kena 8 April, ari Rumah Benggau ngelawa Palan Penyangkai Kapit urung dua jam pejalai.
“Sekali tu pandak agi dibanding enggau taun nyin tadi, urung lapan ngagai sepuluh jam. Bala (pesereta) sebana kelalu jauh. Nya alai taun tu, pejalai digaga semak agi,” ku iya.
“Aku ngarapka taun ke dudi ngadang mayuh agi pesereta laban pekit tu ungkup peranak menua tu empu sereta orang luar. Lumba Bot Laju, Pesta Kapit enggau Fun Fair antara aktiviti diatur berebak enggau batang pengerami berakit ti matak penatai mensia mayuh,” ku Joseph Belayong nambah.
Ku iya, taun baru pekit deka diatur dalam bulan April tang endur ngatur pengerami bedau diputuska. Hari bulan enggau endur deka diputus udah tu, maya ‘post-mortem’ dipejalaika. Iya nyamin, pejalai tentu ba kandang menua enggau sungai ti bebida, naka ulih mungkur mayuh kandang menua.
Ngenang pasal safari rakit, ku Joseph, taun tu jauh manah ari beberapa taun ke udah. Ku iya, rayat berasai chukup rindu ati. Taun nyin tadi semina 26 iti tim, tang taun tu bisi nerima 36 iti tim.
Iya chukup andal madahka ngelama tu penyampau pesereta bisi nurun tang diatu nambah baru, nya kebuah pengawa berakit patut majak diatur.
“Kami deka seruran ngatur pekit berakit disempulang bemacham aktiviti mit ke bukai. Enti kami semina ngatur lumba bot laju aja, peranak menua pesisir enda tentu ngasaika pengerami. Nya kebuah pekit berakit meseti diatur.
“Sapit Kepala Menteri Tan Sri Datuk Amar Dr James Jemut Masing mega dekaka pekit tu ditampung. Kitai udah lama ngatur nya,” ku iya.
Joseph meri terima kasih ngagai semua orang gawa perintah di Bagi Menua Kapit ti udah besaup ngatur pengawa di belakang pemujur tetiap pengawa perintah nyungkak pemanah tikas idup rayat.
Iya mega meri terima kasih ngagai rayat ti udah nyukung pengawa perintah ngemansangka industri dagang temuai di nengeri tu. Terima kasih mega diberi iya ngagau pengiruh bala komiti pengatur Raban Mangku Pengawa Dagang Temuai Bagi Menua Kapit, ti udah bebendar gawa nadai ngira pengelelak nentuka Safari Rakit Baleh-Kapit mujur diatur taun tu.
“Safari Rakit Baleh-Kapit nyadi siti ari pengerami dilis dalam Kalendar Dagang Temuai Sarawak. Naka ke diatu, pengerami tu dikelala ukai semina di Sarawak aja tang mega di serata menua.
“Beberapa taun ke udah, pengerami tu mujur matak pesereta ari Semenanjung. Ngagai sekeda raban, Safari Rakit Baleh-Kapit ukai semina deka menang perais aja, tang mega ninggalka bekau kenang ngagai bala ke datai enggau pesereta pekit,” ku Joseph Belayong.
Taun tu, 3km Safari berengkah ari Rumah Naga, Nanga Merating, Sungai Bena-Sut nengah Rumah Benggau, Nanga Sut, Baleh lalu tembu di Palan Penyangkai Orang Tambang Kapit.
Kelimpah ari berakit, pengerami Safari Rakit BalehKapit 2018 mega begulai enggau Pesta Kapit Kaunsil Pelilih Kapit ngerichahka agi pasar nya, dua hari dua malam.
Seraya nganti rakit datai ba adan di Palan Penyangkai Orang Tambang Kapit, bala pengusung berasai gagit ninga rauh ari Pekit Lumba Bot Laju diatur Serakup Bot Laju Bagi Menua Kapit (KADPA).
Di Kapit empu ngembuan rampa menua ti engkeman endur ngatur main ba sungai, KADPA mujur matak ukai semina bala pesereta datai ari bagi menua bukai di Sarawak tang mega bala pengusung enggau pesereta datai ari Brunei baka taun ke udah.
Ngenang mimit pasal Rumah Naga, peranak Rumah Naga tebilang nama enggau pengelandik ngaga ai tuak. Kelimpah ari ngetanka pemisa, sida mega bisi nambahka asai bukai ba pemanis ai tuak nyadi kelai bansa Iban tu.
Ngagai bala temuai ti rinduka rampa menua asal, penyiru enggau penyelap ai sungai Bena, chukup manah endur ngasaika peneleba mandi sereta nyemerai. Pejalai ngili sungai enggau sebagi ari ayung daun kayu ti tumbuh nebing sungai lalu tu deka mai pengelantang ngagai bala pesereta safari seraya sida berakit ngili sungai.
Tebal agi peranak rumah panjai tu iya nya sida ke indu enggau nembiak mit kelimpah sida ke tuai laban sida ke nembiak mindah ke mengeri ngiga pengawa ke menyana agi. Bulan April pengudah musim ngetau lalu tebal agi sida dipeda ngintu padi di luar enggau dalam rumah.
Rumah Benggau menang Anugerah Menteri Besai, ‘ Anugerah Desa Perdana’ lalu nyadi teladan ba pekara fizikal enggau rama ungkup raban bukai.
Antara sida ke bela nganti penatai rakit di Palan Penyangkai iya nya Joseph Belayong, Sapit Residen Galong Luang, Pemesai Pengatur Pengawa Opis Residen Kapit Belayong Piok, OCPD Kapit DSP Freddy Bian, bala ketuai opis sereta bala ketuai sereta beribu iku mensia mayuh ke bukai.