Peranak di sitak Igan tetap meri sukung ti tegap ngagai parti BN

MUKAH: Peranak di sitak Parlimen Igan tetap milih parti Barisan Nasional (BN) maya Pengawa Bepilih Besai Ke-14 (PRU14) ti deka datai.

Beberapa peranak mantaika sukung nadai bebagi ngagai Parti Pesaka Bumiputera Bersatu (PBB), siti ari komponen parti BN di sitak nya kenyau ari suba.

“Aku endang deka meri sukung ngagai PBB enggau BN, tu endang enda ulih dikenggai,” ku Ayub Alli, 48 taun, peranak ari Kampung Sekaan Kecil, Matu.

Ku iya, timpuh lima taun enti diberi mandat baru ungkup BN di sitak Parlimen Igan nyadi siti tanggungpengawa besai ngagai pengari rayat di renggat parlimen.

“Kitai auska pemansang, nya kebuah kitai begunaka pengari rayat ti semak enggau bala ketuai perintah besai (Putrajaya) ngambika ngemai pemansang ditu,” ku iya ke mega Sekretari PBB Pampang Jemoreng.

Pekara nyata, sitak Igan begunaka belanja besai ungkup pemansang baka projek tagang bah, pelajar, betanam betupi enggau ke bukai.

Seraya Penghulu Kampung Igan Rais Lalong, 64 taun, bela ngaku sitak Igan begunaka mayuh pemansang kelebih agi agih belanja ari perintah besai.

“Mayuh agi pemansang patut digaga di Igan kelebih agi projek besai baka pengawa ngagag jematan, betanam betupi moden enggau ke bukai,” ku iya nerang.

Taja Kaban Kunsil Nengeri ( ADUN) sitak nya udah mayuh mantu, tang kapasiti iya bisi tatak ketegal bisi penekul ba belanja.

Beambika chunto, projek pengadang tebing sungai enggau pantai ti dipelaba sepanjai tiga kilometer patut digaga, begunaka belanja tinggi amat.

“Kitai ngarapka pengari rayat parlimen deka mantu kitai ba semua sukut pemansang pulaika pemaik begulai sereta rebak dudi hari,” ku iya.

Sitak Parlimen Igan mungkur dua sitak Bepilih Kunsil Nengeri (DUN) iya nya DUN Daro enggau DUN Jemoreng.