Pelin pemansang ti diatur ejensi tu ulih dipejalai terus enda nengah SPU enggau EPU
SONG: Ejensi Pemansang Ulu Rajang (URDA) deka ngenyampatka agi pengawa ngemansangka kandang menua ti disengkaum ba kuasa ejensi nya.
Sekretari Besai Parti Pesaka Bumiputera Bersatu (PBB) Datuk Alexander Nanta Linggi madah, ejensi nya ngembuan tanggungpengawa ngatur pelin sereta bejadika pemansang ti enda nengah Unit Perancangan Negeri Sarawak (SPU) tauka Unit Perancang (EPU) Perintah Besai.
“Tu chara baru ke dikena kitai ngenyampatka agi pemansang ba menua ke dipegai URDA laban enti nengah SPU enggau EPU kitai deka bekenaka timpuh ti lama,” pia ku iya madah.
Iya mantaika jaku tu maya makai malam Program Kasihi Pekebun Kecil ke diatur Opis Pelilih Song enggau RISDA ditu, malam kilah ensana.
Nanta madah, pemansang ti digaga URDA tu iya nya pemansang ti senang sereta puku endang ari ejensi nya empu ti lebih agi ngemeratka tikas penatai pemisi rayat.
Iya madahka URDA tu mungkur menua Ulu Rajang, Kapit, Song enggau Kanowit ti ngembuan pemesai 38,000 km ‘persegi’ tauka sebagi ari pemesai nengeri Sarawak.
“Penumbuh URDA tu dikena kitai merambu tauka ngaga pelin pemansang ti deka dipenyadika bala anak kitai ba menua tu dudi hari ila,” ku iya madah baru.
URDA mega ku iya nge-
Tu chara baru ke dikena kitai ngenyampatka agi pemansang ba menua ke dipegai URDA laban enti nengah SPU enggau EPU kitai deka bekenaka timpuh ti lama.
muntangkka agi ngiga orang beranakka puku dikena ngaga projek pemansang nya ila.
Berebak enggau pengerami nya, Nanta bela ngelalau mensia mayuh ngambika enda nempiaka tanah sida pia aja tang tau dikemansang ngambi pulaika penguntung ngagai diri empu.
Kelimpah ari nya ku iya, tanah ti dikemansangka mega deka ngembuan rega ke besai.
Iya madah, sida ke bisi geran tanah tau minta saup RISDA nanam getah lalu sida ke bisi tanah adat bumiputera tang nadai geran tau minta saup ari Opis Betanam Betupi.
“Enti kitai ngemansangka tanah kita, nyema tanah ditujah pemansang dudi hari ila dia tanah kitai bisi rega ke besai agi enti dibida enggau tanah ke diempia nyadi kampung,” pia ku iya madah.
Ba pengerami nya, Nanta bela dipebasa nyuaka setipikit ngagai bala tuai rumah.
Datuk Alexander Nanta Linggi Sekretari Besai Parti Pesaka Bumiputera Bersatu