PH ngena isu pemati niang Bill Kayong ngulihka sukung rayat Sarawak
MIRI: Pakatan Harapan (PH) mengkang ngena pemati niang Bill Kayong nyadika isu dikena ngulihka sukung ari rayat Sarawak, kelebih agi pengundi di Miri ngambika nyukung chalun sida maya Pengawa Bepilih Besai Ke-14 (PRU-14) kena 9 Mei tu.
Kemari, Parti Keadilan Rakyat (PKR) Miri ngelancharka baju T ti ngundan genteran jaku ‘ Keadilan untuk Bill Kayong’ tauka ‘Justice for Bill Kayong’.
Mandal Chairman PKR Sarawak, See Chee How madah, PRU-14 tu nyadi peluang ngagai rayat ngemetulka pengilap ti digaga perintah diatu.
Ku iya, pengundi di Miri patut ngemai pemenang besai ngagai PH kelai tuju sukung ngagai PRU14 ti ngesan reti jaku ‘Justice is alive in Sarawak and Malaysia’.
“PH meri pengarap dikena ngemetulka institusyen menua ti udah jauh nyimpang sereta mulaika baru pengandal enggau pechaya ti udah kamah.”
“Pemenang besai beguna amat dikena mulaika baru pemanah nama kitai ti udah lama dirampas,” ku iya rambau aum pengarang berita pengudah pengawa ngelancharka baju T ‘Keadilan untuk Bill Kayong’ dikena ngingatka pengawa ditegika niang di opis PKR ditu, kemari.
See ke mega Kaban Kunsil Nengeri (ADUN) Batu Lintang nambah, penyandang Kaban Parlimen Miri, Dr Michael Teo enggau niang Bill udah bejalaika pengawa pemadu manah ungkup parti.
“Pemati Bill Kayong ti dibunuh kena 21 Jun 2016 ukai semina enda diputar ngena pengelurus ungkup niang enggau sida sebilik, tang mega enda lurus ngagai rayat di Miri, Sarawak enggau Malaysia.
Ku iya, Hari Satu tu tadi Kort Apil nulak apil raban pendakwa raya ti ngaga apil ba pengawa ngelepas tiga iku dituduh, lalu tentu sekalika pendakwa raya deka ngapil ngagai Kort Besai.
Ba pekarab tu, beguna amat pengundi di Miri enggau Sarawak nyukung PH dikena ngemetulaka pengelemi atur pengawa sereta mega ngerandang pengawa numbuhka perintah baru ti lurus.
Sama bisi datai Mandal Presiden Indu PKR Voon Shiak Ni enggau ketuai PKR Miri Dr Michael Teo.