Bansa Dayak dilalau meri sukung ngagai chalun BN maya PRU14

JULAU: Bansa Dayak deka ngasaika mayuh agi pemansang enti sida meri sukung ke tegut ngagai chalun Dayak tauka semua chalun Barisan Nasional (BN) ba Pengawa Bepilih Ke-14 (PRU14) tu.

Sekretari Besai Parti Rayat Sarawak (PRS) Datuk Joseph Salang madah, enti mayuh agi pengari ba renggat perintah besai dia pengawa ngaduka pemansang rayat deka lantang agi diumbaka penyampau pengari ba perintah nengeri bela mayuh.

Ku iya, ba renggat nengeri sekeda pengari Dayak udah dipilih megai tanggungpengawa ke besai sereta beguna bendar ngagai pemujur perintah megai menua tu.

“Pengari Dayak tu baka Presiden PRS Tan Sri Dr James Jemut ti nyadi Sapit Kepala Menteri kelimpah nyadi Menteri Pemansang Infrastruktur enggau Perengka Pengangkut.

“Kitai Dayak mega bisi siku agi Sapit Kepala Menteri iya nya Datuk Amar Douglas Uggah ke mega Menteri Betanam Betupi Moden, Tanah Adat enggau Pemansang Kandang Menua,” pia ku iya madah maya pengerami begulai enggau rayat ba Rumah Nyanau Kelukut, Mujok ditu, kilah ensana.

Dulu agi ari nya, iya dipebasa bejadi jalai semin enggau projek ai rumah panjai nya.

Ku Salang, ba pekara pelajar Dayak bisi pengari baka Datuk Sri Micheal Manyin ti nyadi Menteri Pelajar, Sains enggau Pemansik Teknologi.

“Kitai mega bisi Datuk Sri Dr Stephen Rundi ti megai pengawa Menteri Perengka Guna Mensia Mayuh,” ku iya madah baru.

Iya madah, enti sukung rayat ngelama tu ditanka dia Kaban Parlimen Dayak ke diatu ti bekerejasama enggau bala pengari Dayak ba renggat perintah nengeri deka lantang agi bejakuka rayat ba ditu.

Ku iya, kedua piak antara pengari renggat perintah besai enggau renggat nengeri mega tau bekunsika penemu ti deka mai pemaik ngagai rayat.

Salang ti agi dikeandalka PRS ngetanka Parlimen Julau serak PRU14 tu mega madahka agi mayuh peminta rayat kediatu semina ulih dipenyadika piak ti endang ulih mutarka peminta rayat.

“Ketegal nya aku minta rayat lebih agi di menua pesisir anang sanggu ngundi chalun Dayak ngambika menua tu deka semampai ulih dikemansang lalu kita bela ngasaika pengelantang,” ku iya madah.

Bekaul enggau manifesto BN nengeri PRU14, Salang madahka semua nya digaga bepelasarka pengidup, pengelantang enggau pemansang rayat.

Tu mega ku iya nyengkaum sadang ti deka nambahka agi tikas pemanah perengka guna mayuh enggau telekomunikasyen nengeri tu.

Iya madah, semua nya nyadika pelasar nengeri tu datai ba tikas nengeri ekonomi digital.

“Anang enda pechaya manifesto tu endang deka dipenyadika udah tu ila,” pia ku iya.

Salang mega madah, bepun ari pemesai guna teknologi pemadah, Julau diatu udah bisi 25 iti legit telekomunikasyen, ti mega pemadu mayuh ba nengeri Sarawak.

“Taja pan baka nya, kitai ngembuan juluk ati deka nambah 10 iti agi legit telekomunikasyen tu dudi hari ila,” ku iya madah maya nya.

Ba pengerami nya, Salang bisi nyuaka geran Projek Mit Menua Pesisir RM419,000 ngagai 29 buah rumah panjai ba menua nya.