KM ngarapka dua pengari indu ari Sarawak ditanka ba PRU14 KM meri besai terima kasih ngagai Menteri Besai ti udah meri peluang, kuasa ngagai orang indu dalam kabinet perintah besai
KOTA SAMARAHAN: Chairman Barisan Nasional (BN) Sarawak Datuk Patinggi Abang Johari Tun Openg ngarapka dua iku indu nengeri tu ke endang udah dalam kabinet menua ulih terus ditanka maya Pengawa Bepilih Besai Ke14 (PRU14).
Kepala Menteri nya beterima kasih ngagai Chairman BN Pusat Datuk Seri Najib Tun Razak laban ke meri peluang enggau kuasa ngagai orang indu ari Sarawak dalam kabinet perintah besai.
“Ngarapka dua iku indu ari Sarawak ke endang udah dalam kabinet menua ulih ditanka (PRU14).
“Tan Sri Shahrizat pesan ngagai Tok Najib tanka dua iku nya laban orang indu Sarawak tu gawa bebendar deka nentuka BN menang 29 sitak di Sarawak,” ku Abang Johari seraya nerima tempik jari ari semua orang ke bisi datai ngagai pengerami nya.
Abang Johari nyebut pekara nya lebuh bejadika Jentera PRU14 Wanita BN Sarawak ke diatur Orang Indu BN Sarawak ba Dewan Suarah ditu, kemari.
Pengudah menang ba PRU13, dua iku indu ari Sarawak dipasukka ke dalam kabinet menua iya nya Datuk Seri Rohani Abdul Karim ke nyadi Menteri Pemansang Orang Indu, Ruang Bilik enggau Raban Bansa ti mega penyandang Parlimen Batang Lupar sereta Datuk Seri Nancy Shukri nyadi Menteri ba Opis Menteri Besai ti mega penyandang Parlimen Batang Sadong.
Bejaku baru iya madahka maya PRU14 iya minta perintah ke bisi sebedau tu terus diberi peluang ngiring menua sereta terus meri sukung ngagai Datuk Seri Najib Tun Razak nyadi menteri besai.
“Sarawak deka terus nempa kerejasama enggau Najib. Iya udah besemaya enggau kitai deka meri pulai baru kah Sarawak ngena chara konsesus. Bisi 13 pekara ke udah diliska sereta asil ari pengawa berunding udah dipesetuju Najib,” ku iya ti madahka diri nampung minta pulai hak Sarawak ari niang Tok Nan.
Taja pia Abang Johari ngarap sereta ngingatka pekara ke pemadu dikemeratka mega iya nya penyerakup, menua ti stabil sereta nentuka perintah ke ulih mai pengelantang terus ngiring menua.
Iya madahka diri enda irauka Sarawak laban rayat di nengeri tu taja mayuh pupu bansa enggau jalai pengarap tang ulih beserakup tauka diau seiti perabung.
Bisi datai ba pengerami nya, Pengarah Operasi PRU14 ti mega Sapit Kepala Menteri Datuk Amar Dougals Uggah Embas, Presiden PRS ti mega Sapit Kepala Menteri Tan Sri Datuk Amar James Jemut Masing, Ketuai Orang Indu BN Kebangsaan Tan Sri Shahrizat Abdul Jalil, Ketuai Orang Indu BN Sarawak Dato Sri Fatimah Abdullah enggau ke bukai.