Mensia mayuh dilalau datai ke Final Pekit Keling Kumang RNI kena 14 April
KUCHING: Raban pengemeran ngepan asal iban Gerempung Raban Ngepan Iban (RNI) ngelalau mensia mayuh bela datai ngulu Final Pekit Keling Kumang RNI Renggat Nengeri Sarawak 2018 ti deka digaga ba Dewan Suarah Miri kena 14 April, berengkah ari pukul 6 lemai.
Presiden RNI Steven Abas Patrick Agus madah taun tu sambut ari bala temuai sereta penyukung ba taun tu endang chukup richah lalu enda baka taun ke udah.
“Aku chukup temegah ati meda sambut mensia mayuh sentang tikit ti dijual enda baka taun ke udah. Taun tu kami ngatur pekit ba Dewan Suarah Miri lalu udah nyediaka 50 iti mija ti berega RM500 siti mija ungkup sida ti deka ngulu pengerami malam nya.
“Kelimpah ari nya aku deka meri terima kasih ngagai semua agih belanja ti udah diberi ngagai gerempung nya bejalaika pekit tu, lalu bedau lama tu tadi Sapit Kepala Menteri Tan Sri James Jemut Masing udah nyuaka geran Projek Mit Menua Pesisir (MRP) ngagai gerempung tu ungkup bejalaika aktiviti ti udah dilangkar,” ku iya bejaku lebuh dikerandau, kemari.
Beserimbai enggau pen- gawa tu, Steven mega ngelalau mensia mayuh ngambika enda leju ngetanka ngepan asal lalu sama begulai ngangkatka pesaka asal kitai Iban ti dikembuan kenyau ari kelia.
Ba kenang ke bukai, Masing ngelalau semua bantu ti udah diberi perintah meseti dikena memanah nitihka langkar projek ke udah dipelin ungkup pemaik gerempung sereta nengeri.
Ku Sapit Kepala Menteri Tan Sri James Jemut Masing madah, iya ngarapka tetiap gerempung ti udah diberi agih belanja nya ngambi seruran nentuka langkar projek ti digaga pulaika pemaik ger- empung kelebih agi ungkup komuniti di nengeri tu, ku iya bejaku lebuh pengawa nyuaka chek Projek Mit Kandang Menua Pesisir (MRP) renggat keterubah 2018 di Ringkat 5, Begunan Baitul Makmur, ditu bedau lama.
“Penyampau RM855,000 diagih ngagai gerempung nyengkaum ke ukai dikuasa perintah (NGO) ba renggat keterubah taun tu.
Ari penyampau nya ku Masing, RM443,000 diagih ngagai gerempung di Kapit ke udah disua dulu agi ari tu lalu RM325 000 disua kemari ungkup 20 penerima di Kuching.