Penumbuh INFRA setipak enggau juluk perintah numbuhka Taman Industri Bio
KOTA SAMARAHAN: Kampus Latih Institut Kemajuan Desa (INFRA) Pampang Menua Sarawak setipak enggau pengawa perintah menua numbuhka Taman industri Bio.
Kepala Menteri Datuk Patinggi Abang Johari Tun Openg madah Taman industri Bio nya deka digaga di Kota Samarahan besemak enggau palan ngumpul asil pengawa betanam betupi enggau pemisi rampa menua.
Iya madah Taman Industri Bio nya deka nyengkaum industri bepelasarka pengawa betanam betupi sereta pemisi biodiversiti.
“Kemari aku setuju deka numbuhka Taman Perindustrian Bio di Kota Samarahan, besemak enggau palan ngumpul asil pengawa betanam betupi enggau pemisi rampa menua.
“Perintah bisi nerima sekeda sadang ari kompeni menua luar ke bisi ati ngaga kerejasama enggau Opis Kunsil Biodiversiti Sarawak bejalaika pengawa pansik barang mata bepelasarka pengawa betanam betupi enggau biodiversiti ke Sarawak,” ku iya.
Iya madah munyi nya lebuh dikerandau pengudah bejadika Opis Kunsil Kampus INFRA pampang menua Sarawak ( pre- launching) ditu, kemari.
Bekaul enggau Kampus INFRA Pampang Nengeri Sarawak, Abang Johari madah, iya deka nyadi palan pengawa latih ngagai pun menua sereta orang dagang ari menua pesisir di menua tu.
Ku iya, pengawa latih tetap ti bisi disediaka INFRA deka ngenyadika sekeda raban nambah pengelandik sida iya dalam pemansang genturung pendiau sereta pengawa dagang.
Iya nandu baru madahka pekara nya deka nyadi pemungkal ke industri bukai ari batang batang industri di menua tu ke bepelasarka pengawa betanam betupi enggau pemisi rampa menua.
“Perintah meri puji ngagai Opis Menteri Pemansang Menua Pesisir enggau Kandang Menua (KKLW) laban udah ngaga Kampus INFRA di Kota Samarahan.
“Pengawa bansa tu meri pengulih ngagai Perintah ngaga pengawa latih kelebih agi ngagai Kaban Komiti Pemansang enggau Pengelikun Kampung (JKKK), kedua, laban kitai ulih ngena perengka guna INFRA ngelatih orang dagang menua pesisir lalu dalam timpuh nya mega sama ngemansangka industri hiliran di Sarawak,” ku iya.
Abang Johari nandu baru madahka Kampus INFRA Pampang Sarawak deka mantu ngemansangka pampang pengawa betanam betupi moden di menua tu ke bepelasarka teknologi.
“INFRA deka nyadi sebagi ari sebuah palan alai ngelatih orang dagang kitai,” ku iya.
Kampus INFRA Pampang Menua Sarawak nyadi kampus pengawa latih kedua INFRA, pengudah kampus besai iya ti bisi dibuka di Bangi, Selangor, lalu dipelabaka deka tembu endar dalam bulan Jun tu ila.
Kampus tu nyadi projek pemansang KKLW nengah Langgur Pemansang Malaysia Lumpar Ke- 10 (RMK-10) lalu digaga enggau ungkus RM55.6 juta.
Sebedau nya, Direktor pampang Kereja Bangunan Am 2, Opis Kereja (JKR), Putra Jaya Samini Omar madah, naka ke diatu, penembu kampus nya udah manggai urung 84.62 persin.
“Projek tu dipelabaka tembu dalam bulan Mac taun tu tang ketegal bisi penanggul teknikal, iya nya ‘pile’ enda tau enda digaga baru laban langkar asal enda ngipak enggau gaya tanah ditu, ngujungka penembu nya deka ngambi timpuh ke panjai mimit ke bala kuntriktor ngenembuka projek nya.
“Nya alai, naka kediatu, projek nya deka tembu dalam bulan Jun taun tu, lalu deka diserah ngagai KKLW dalam bulan Jun tauka pengabis laun pan dalam bulan Julai tu ila,”ku iya.
Entara perengka guna ke bisi dikampus nya ila, iya nya rumah blok dua ringkat (alai opis pengereja pengawa INFRA Sarawak enggau Opis KKLW Sarawak), blok akademik, buding enggau dewan makai.
INFRA nyendiaka mayuh macham bansa pengawa latih ngagai raban ke bisi penge- landik dalam pekara tu baka pemesai pun menua (ketuai pupu bansa enggau ketuai komuniti), nembiak, orang indu enggau komuniti menua pesisir Sarawak.
Program pengawa latih ke bisi disediaka, iya nya ba renggat ke tinggi agi nyengkaum program pengawa latih renggat setipikit ke dikelala ulih Opis Pemansang Pengelandik sereta renggat diploma enggau kerejasama Palan Pelajar Tinggi Perintah enggau swasta.
Kampus tu mega nyadi palan alai nanya dalam pekara pemansang enggau pansik menua pesisir ke menua Sarawak, ke ngambi orang ke ngajar ba palan nya, orang ke profesional sereta kerejasama enggau pakar dalam pekara ke bisi bekait enggau ngemunaska meskin seranta sereta nambah pemisi mensia mayuh ke diau di menua pesisir.
Sama bisi enggau ngulu atur pengawa nya kemari, bini Kepala Menteri, Datin Patinggi Dato Juma’ani Tuanku Bujang, Sapit Kepala Menteri Datuk Amar Douglas Uggah Embas, Sekretari Perintah Menua Tan Sri Datuk Amar Morshidi Abdul Ghani, Menteri Muda Utiliti Dato Sri Dr Stephen Rundi Utom enggau Menteri Muda Pengelantang Komuniti Datuk Francis Harden Hollis.